കളമശ്ശേരി: റെയില്വേക്കു ആവശ്യമായ ഇരുമ്പ് ചക്രങ്ങള് നിര്മിക്കുന്നതിനാവശ്യമായ കമ്പ്യൂട്ടര് നിയന്ത്രിത ഹെവി ഡ്യൂട്ടി ലൈത് നിര്മ്മിച്ച് എച്ച്എംടി യൂണിറ്റ്. കഴിഞ്ഞ രണ്ടു വര്ഷത്തോളമായി എച്ച്എംടിയിലെ വിദഗ്ധരായ എഞ്ചിനീയര്മാരുടെ നേതൃത്വത്തില് പ്രവര്ത്തിച്ചിരുന്ന റിസര്ച്ച് ആന്ഡ് ഡെവലപ്മെന്റ് ടീം ആണ് യന്ത്രം വികസിപ്പിച്ചത്.
ഓരോ വര്ഷവും കോടി കണക്കിന് രൂപയുടെ ഇത്തരത്തിലുള്ള നിരവധി യന്ത്രങ്ങള് ആവശ്യമാണെന്നിരിക്കെ റെയില്വേയുടെ ആവശ്യം പരിഗണിച്ചാണ് എച്ച്എംടി പുതിയ യന്ത്രം നിര്മാണത്തിനായി പരിശ്രമിച്ചത്. റെയില്വേക്കാവശ്യമായ വീല് ആക്സില് ഉണ്ടാക്കുന്നതിനുള്ള വന്കിട കമ്പ്യൂട്ടര് നിയന്ത്രിത യന്ത്രവും എച്ച്എംടി കളമശേരി യൂണിറ്റ് നിര്മിച്ചു നല്കുന്നുണ്ട്. റെയില് ബോഗികളില് ഘടിപ്പിച്ചിട്ടുള്ള വീലുകള് കാലപ്പഴക്കത്തില് വരുന്ന തേയ്മാനം പരിഹരിച്ചു റെയില് ബോഗികളില് നിന്നും അഴിച്ചു മാറ്റാതെ തന്നെ വീലുകള് പുതുക്കി പണിയുന്നതിന് ആവശ്യമായ അണ്ഡര്ഫ്ളോര് ലൈതിന്റെ നിര്മാണത്തിനും എച്ച്എംടി കളമശേരി തയാറെടുക്കുകയാണ്.
റെയില്വേക്കാവശ്യമായ ഇത്തരം യന്ത്രങ്ങള് സ്വകാര്യമേഖലയില് മാത്രമാണ് നിര്മിക്കുന്നത്. അതുകൊണ്ടു തന്നെ ഇത്തരം യന്ത്രങ്ങള്ക്കു റെയില്വേ ഇരട്ടി വില നല്കേണ്ട സ്ഥിതിയാണ്. പൊതുമേഖലാ സ്ഥാപനമായ എച്ച്എംടി റെയില്വേക്കു വേണ്ടി സ്വകാര്യമേഖല ഇപ്പോള് നിര്മിക്കുന്ന യന്ത്രങ്ങളെക്കാള് അത്യാധുനിക നിലയിലാണ് നിര്മ്മിച്ചിട്ടുള്ളത്. അതുകൊണ്ടു തന്നെ ആഭ്യന്തര വിപണി മാത്രമല്ല വിദേശ വിപണിയും ലക്ഷ്യമാക്കി തന്നെയാണ് എച്ച്എംടി കളമശേരിയുടെ റിസര്ച്ച് വിഭാഗം തയാറെടുത്തിട്ടുള്ളത്. 2014ല് നേവല് ഷിപ്പുകള്ക്കാവശ്യമായ ഡയറക്ടിങ് ഗിയര് നിര്മിച്ചതിലൂടെ രാജ്യത്തിനകത്തും വിദേശ വിപണിയും വന്തോതില് ഏറ്റെടുക്കാനായതും എച്ചഎംടി കളമശേരി യൂണിറ്റിനും വലിയ നേട്ടമുണ്ടാക്കാനായി.
സര്ഫെസ് വീല് ലൈത് ഫാക്ടറി മന്ത്രി പി. രാജീവ് ഉദ്ഘാടനം ചെയ്തു. എച്ച്എംടി ജനറല് മാനേജര് എസ് ബാലമുരുകേശന് അധ്യക്ഷനായി. എച്ച്എംടി യൂണിറ്റ് ചീഫ് പി.എസ്. സുരേഷ്, ജിസിഡിഎ ചെയര്മാന് കെ. ചന്ദ്രന്പിള്ള, എച്ച്എംടി വാര്ഡ് കൗണ്സിലര് സല്മ അബൂബക്കര്, ബിഎംസ് സംസ്ഥാന സെക്രട്ടറി മധുകുമാര്, എന്സിഒഎ സെക്രട്ടറി ഗിരീഷ് ബാബു, ജോണ്സന് പാനിക്കുളം എന്നിവര് സംസാരിച്ചു.
