മണികണ്ഠന്‍ കുറുപ്പത്ത്
ഗുരുവായൂര്‍: സാന്ദീപനി മാതൃസദനത്തിലെ അന്തേവാസികളായ 16 അമ്മമാര്‍ അഭിനയിച്ച ‘ഞങ്ങള്‍’ എന്ന ഹ്രസ്വ ചിത്രം ശ്രദ്ധേയമാകുന്നു. ചോര നീരാക്കി കഷ്ടപ്പെട്ടു വളര്‍ത്തിയ മക്കള്‍ ഉപേക്ഷിച്ച് മാതൃസദനത്തിന്റെ കാരുണ്യ വലയത്തില്‍ നില്‍ക്കുന്ന ഒരു പറ്റം അമ്മമാര്‍ തങ്ങള്‍ക്ക് ലഭിച്ച വേഷം അഭിനയിക്കുകയായിരുന്നില്ല, ജീവിച്ചു കാണിക്കുകയായിരുന്നു. അന്തേവാസിയായ രുഗ്മിണി അമ്മ എന്ന വയോധികയുടെ ജീവിതമാണ് സംവിധായിക പ്രസി ദിനേഷ് ചിത്രത്തിലൂടെ വരച്ചുകാട്ടുന്നത്.
ചെറുതുരുത്തി സ്വദേശിയായ രുഗ്മിണി അമ്മ (70) യുടെ വിവാഹം 17 ാം വയസില്‍ കഴിഞ്ഞതാണ്. രണ്ടു മക്കളുടെ അമ്മയായിയിരിക്കെ രുഗ്മിണി വിധവയായി. പറക്കമുറ്റാത്ത കുഞ്ഞുമക്കളെ തന്നെയേല്‍പ്പിച്ച് എന്നെന്നേക്കുമായി പോയ്‌മറഞ്ഞ പ്രിയതമന്റെ ഓര്‍മ്മകളില്‍ മക്കളെ പൊന്നുപോലെ നോക്കി വളര്‍ത്തി. കൂലിപ്പണിയെടുത്ത് കിട്ടിയ പണം കൊണ്ട് മക്കളെ രണ്ടു പേരെയും അധ്യാപകരാക്കി. മക്കളുടെ വിവാഹ ശേഷം വീട്ടില്‍ മാനസിക പീഡനം ഏറ്റുവാങ്ങേണ്ടി വന്ന രുഗ്മിണി അമ്മ മക്കളോട് എതിര്‍വാക്ക് പറയാന്‍ കെല്‍പ്പില്ലാത്തതിനാല്‍ സ്വയം പടിയിറങ്ങിയതാണ്. ഗുരുവായൂര്‍ അമ്പലനടയിലെത്തിയ ഇവര്‍ ദിവസങ്ങളോളം അവിടെ ചിലവഴിച്ചു. മമ്മിയൂരിലുള്ള സാന്ദീപനി മാതൃസദനത്തില്‍ എത്തിയതോടെ രുഗ്മിണി അമ്മക്ക് മുന്നില്‍ പുതിയ ലോകം തുറക്കപ്പെട്ടു.
ചിത്രത്തില്‍ സാന്ദീപനി മാതൃസദനത്തിലെ 19 അന്തേവാസികളില്‍ 16 പേര് തങ്ങളുടെ ജീവിതത്തിന്റെ നേര്‍ക്കാഴ്ചകള്‍ രുഗ്മിണി അമ്മക്കൊപ്പം അഭിനയിച്ചു. ജാനകിയമ്മയെന്ന കഥാപാത്രത്തെ അവതരിപ്പിച്ച രുഗ്മിണി അമ്മക്കൊപ്പം അന്തേവാസികളായ കുന്നംകുളം സരോജിനിയമ്മയും, ഷൊര്‍ണൂര്‍ സരോജിനിയമ്മയും തങ്ങളുടെ വേഷം അഭിനയിച്ചു പ്രതിഫലിപ്പിച്ചു. സ്ഥാപനത്തിലെ അന്തേവാസികളായ 6 പേരും, സെക്രട്ടറി പങ്കജം ടീച്ചര്‍, രുഗ്മിണി അമ്മയുടെ മക്കളായി ശ്രീജിത് പഴയന്നൂരും ഭാവനയും വേഷമിട്ടു.
ഗുരുവായൂരിലും പരിസരത്തുമായി 3 ദിവസം കൊണ്ട് ചിത്രീകരിച്ച ‘ഞങ്ങള്‍’ എന്ന ഷോര്‍ട്ട് ഫിലിം സാന്ദീപനി മാതൃസദനമാണ് നിര്‍മിച്ചിരിക്കുന്നത്. സ്ഥാപനത്തിലെ കൗണ്‍സിലറായ പ്രസി ദിനേഷ് തന്നെയാണ് കഥയും തിരക്കഥയും സംവിധാനവും കൈകാര്യം ചെയ്തിരിക്കുന്നത്.
വീട്ടില്‍ നിന്നും പടിയിറക്കപ്പെട്ട് മാതൃസദനത്തിലെത്തി കാലങ്ങള്‍ക്ക് ശേഷം തെറ്റുകള്‍ മനസിലാക്കി മക്കളെത്തി ജാനകി അമ്മയെ തിരികെ വീട്ടിലേക്ക് കൊണ്ടു പോകുന്നതോടെയാണ് ചിത്രം തീരുന്നത്. സ്വന്തം ജീവിതം ക്യാമറക്കു മുന്നില്‍ അഭിനയിച്ചു പ്രതിഫലിപ്പിച്ച രുഗ്മിണി അമ്മക്ക് ഇപ്പോഴും ആഗ്രഹമുണ്ട്, ജീവിതത്തിലും ഒരു ദിനം തന്റെ പൊന്നുമക്കള്‍ ഒരു ദിനം തേടി വന്നെത്തുമെന്ന്.
