തിരുവനന്തപുരം: ജനുവരി 12ാം തീയതി സിപിഎംപോപ്പുലര് ഫ്രണ്ട് കൂട്ടുകെട്ടിനെതിരെ ബിജെപി സെക്രട്ടറിയേറ്റ് മാര്ച്ച് നടത്തുമെന്ന് സംസ്ഥാന ജനറല്സെക്രട്ടറി ജോര്ജ് കുര്യന് വാര്ത്താസമ്മേളനത്തില് പറഞ്ഞു. സംസ്ഥാന അദ്ധ്യക്ഷന് കെ.സുരേന്ദ്രന് ഉള്പ്പെടെയുള്ള സംസ്ഥാന നേതാക്കള് മാര്ച്ചിന് നേതൃത്വം നല്കും. പോപ്പുലര് ഫ്രണ്ട് ഭീകരതയ്ക്കെതിരെ ജനാഭിപ്രായം രൂപീകരിക്കുന്നതിന് വേണ്ടി സംസ്ഥാനത്ത് എല്ലാ ജില്ലകളിലും ജനുവരി 15,16,17, തീയതികളില് വലിയ രീതിയിലുള്ള പൊതുസമ്മേളനങ്ങള് നടത്താനും കോഴിക്കോട് ചേര്ന്ന സംസ്ഥാന ജനറല് സെക്രട്ടറിമാരുടെ യോഗം തീരുമാനിച്ചു. ‘ പോപ്പുലര് ഫ്രണ്ട് ഭീകരതയ്ക്കെതിരെ ജനകീയ പ്രതിരോധം ‘ എന്നതായിരിക്കും മുദ്രാവാക്യം.
സംസ്ഥാനത്ത് ഈ രീതിയില് 25 പൊതു യോഗങ്ങള് സംഘടിപ്പിക്കുമെന്നും ജോര്ജ് കുര്യന് അറിയിച്ചു. പോപ്പുലര് ഫ്രണ്ട് തീവ്രവാദികള് ക്രൂരമായി കൊലപ്പെടുത്തിയ അഡ്വ.രജ്ഞിത്ത് ശ്രീനിവാസന് അഭിഭാഷകരുടെ നേതൃത്വത്തില് ശ്രദ്ധാജ്ഞലി സംഘടിപ്പിക്കും. ജനുവരി 7 മുതല്12 വരെ എല്ലാ ജില്ലകളിലും അഭിഭാഷക കൂട്ടായ്മയുടെ ശ്രദ്ധാജ്ഞലി നടക്കും.
കെറയില് കേരളത്തില് നടപ്പിലാവില്ലെന്നും പിണറായി വിജയന് അതിന് ശ്രമിച്ചാല് മറ്റൊരു നന്ദിഗ്രാമായിരിക്കും ഫലമെന്നും ജോര്ജ് കുര്യന് മുന്നറിയിപ്പ് നല്കി. അന്നത്തെ ബംഗാള് മുഖ്യമന്ത്രി ബുദ്ധദേവ് ഭട്ടാചാര്യയുടെ അതേ ഭാഷയിലാണ് മുഖ്യമന്ത്രി പിണറായി വിജയന് സംസാരിക്കുന്നത്. ജനങ്ങളുടെ ചോദ്യങ്ങള്ക്ക് മുഖ്യമന്ത്രി മറുപടി നല്കുന്നില്ല. അശാസ്ത്രീയവും ഗുണരഹിതവുമായ കെറെയില് പദ്ധതിയ്ക്കെതിരെ കെറെയില് കടന്ന് പോകുന്ന എല്ലാ ജില്ലകളിലും ജില്ലാ പ്രസിഡന്റുമാര് നയിക്കുന്ന കെറെയില് വിരുദ്ധ പദയാത്ര ജനുവരി 25 നും 30 നും മിടയില് നടത്തും.
പഞ്ചാബിലെ പ്രധാനമന്ത്രിയുടെ സുരക്ഷാ വീഴ്ച്ച പോലുള്ള നടപടി കോണ്ഗ്രസ് മുക്ത ഭാരതം എളുപ്പമാക്കുമെന്ന് കുര്യന് പറഞ്ഞു. കോണ്ഗ്രസിന്റെ ഫാസിസ്റ്റ് സമീപനമാണ് ഇതോടെ വ്യക്തമാകുന്നത്. ഇതിന് മുന്കൈ എടുക്കുന്നത് രാഹുല് ഗാന്ധിയാണ്. കേരളത്തിലെ പ്രതിപക്ഷ നേതാവും നീങ്ങുന്നത് ഇതേ രീതിയിലാണ്. മുഖ്യമന്ത്രിയെയും ഇടത് സര്ക്കാരിനെയും പ്രതിപക്ഷ നേതാവ് സംരക്ഷിക്കുകയാണെന്നും ജോര്ജ് കുര്യന് പറഞ്ഞു.
