ന്യൂദല്ഹി: കൂനൂര് ഹെലികോപ്ടര് അപകടത്തില് മരണമടഞ്ഞ സംയുക്ത സൈനിക മേധാവി ജനറല് ബിപിന് റാവത്ത് രാജ്യത്തിനായി നല്കിയ അവസാന സന്ദേശം പുറത്തുവിട്ട് കരസേന. ഹെലികോപ്ടര് അപകടത്തിന് ഒരു ദിവസം മുമ്പ് റെക്കോര്ഡ് ചെയ്ത വീഡിയോയാണ് സൈന്യം പുറത്തുവിട്ടത്.
1971 ലെ ഇന്ത്യ പാകിസ്ഥാന് യുദ്ധവിജയത്തിന്റെ വാര്ഷികാഘോഷം സ്വര്ണിം വിജയ് പര്വിന്റെ ഭാഗമായാണ് വീഡിയോ റെക്കോര്ഡ് ചെയ്തത്. ഒരു മിനിറ്റ് ദൈര്ഘ്യമുള്ള വീഡിയോ ഇന്ന് സ്വര്ണിം വിജയ് പര്വിന്റെ ഉദ്ഘാടനചടങ്ങിലാണ് പ്രദര്ശിപ്പിച്ചത്. ഈ അവസരത്തില് നമ്മുടെ ധീരജവാന്മാര്ക്ക് ആദരാഞ്ജലികള് അര്പ്പിക്കുന്നുവെന്ന് പറഞ്ഞാണ് അദ്ദേഹത്തിന്റെ പ്രസംഗം ആരംഭിക്കുന്നത്. അവരുടെ ത്യാഗങ്ങളെ സ്മരിക്കുന്നു.
നമ്മുടെ ധീരജവാന്മാരുടെ സ്മരണയ്ക്കായി സ്ഥാപിച്ച അമര് ജവാന് ജ്യോതി കോംപ്ലക്സില് വിജയ് പര്വ് സംഘടിപ്പിക്കുന്നത് അഭിമാനകരമാണ്. വിജയ് പര്വ്വില് പങ്കെടുക്കാന് എല്ലാവാരെയും ഞങ്ങള് ക്ഷണിക്കുന്നു. നമ്മുടെ സൈന്യത്തെയോര്ത്ത് നമുക്ക് അഭിമാനിക്കാം, വിജയദിവസം നമ്മുക്ക് ഒരുമിച്ച് ആഘോഷിക്കാം എന്ന് പറഞ്ഞുകൊണ്ടാണ് അദ്ദേഹം പ്രസംഗം അവസാനിപ്പിക്കുന്നത്
