കൊച്ചി : പാതയോരങ്ങളില് അനധികൃതമായി കൊടിമരങ്ങള് സ്ഥാപിക്കുന്നതില് സംസ്ഥാന സര്ക്കാര് എന്തുകൊണ്ട് നടപടി കൈക്കൊള്ളുന്നില്ലെന്ന് ഹൈക്കോടതി. നിരത്തുകളില് സ്ഥാപിക്കുന്ന കൊടിമരങ്ങള് നിയമ വിരുദ്ധമാണെന്ന് സംസ്ഥാന സര്ക്കാര് അറിയിച്ചതിന് പിന്നാലെയാണ് ഹൈക്കോടതി ഈ മറുചോദ്യം ചോദിച്ചത്. നിയമം തെറ്റിക്കുന്നവര്ക്കെതിരെ മുഖം നോക്കാതെ നടപടി സ്വീകരിക്കണമെന്നും കോടതി അറിയിച്ചു.
കൂടാതെ പാതയോരങ്ങളിലെ നിയമവിരുദ്ധ കൊടിമരങ്ങള് മാറ്റാന് ജില്ലാകളക്ടര്മാര്ക്കും ഹൈക്കോടതി നിര്ദ്ദേശം നല്കി. തടസ്സമുണ്ടാക്കുന്ന വിധത്തില് കൊടിമരങ്ങള് നാട്ടുന്നവര്ക്കെതിരെ ഭൂസംരക്ഷണ നിയമപ്രകാരം നടപടി എടുക്കണം. അടുത്ത തവണ കേസ് പരിഗണിക്കുമ്പോള് എടുത്ത നടപടികള് കോടതിയെ അറിയിക്കണമെന്നും ഹൈക്കോടതി നിര്ദേശിച്ചു.
അതേസമയം എല്ലാ പാര്ട്ടികളുടെയും സമവായത്തോടെ കൊടിമരം നീക്കം ചെയ്യുന്നതിനെക്കുറിച്ച് ആലോചിച്ച് വരുകയാണെന്ന് സര്ക്കാര് അറിയിച്ചു. മുഖ്യമന്ത്രി സര്വ്വകക്ഷിയോഗം വിളിച്ച് ചര്ച്ച ചെയ്യുമെന്നും സര്ക്കാര് അഭിഭാഷകന് ഹൈക്കോടതിയില് പറഞ്ഞു.
അനധികൃത കൊടിമരങ്ങള് നീക്കുന്നതിനായി നയം രൂപീകരിക്കാന് മൂന്നു മാസത്തെ സമയം നല്കണമെന്നും സര്ക്കാര് ആവശ്യപ്പെട്ടു. എന്നാല് അനധികൃത കൊടിമരങ്ങള്ക്ക് എതിരെ ജില്ലാ കളക്ടര്മാര് നടപടി എടുക്കാത്തത് എന്തുകൊണ്ടാണ്. അതിനായി ഇനിയും മൂന്ന് മാസം സമയം നല്കാനാകില്ലെന്നും കോടതി കൂട്ടിച്ചേര്ത്തു.
