ബോളിവൂഡ് താരം അക്ഷയ് കുമാര്‍ നായകനാകുന്ന പുതിയ ചിത്രം പ്രിഥ്വിരാജിന്റെ ട്രെയിലര്‍ പുറത്തു വിട്ടു. ചന്ദ്രപ്രകാശ് ദ്വിവേദിയാണ് സംവിധാനം ചെയ്യുന്ന ചിത്രത്തില്‍ സഞ്ജയ് ദത്ത്, അശുതോഷ് റാണ, സോനു സൂദ് എന്നിവരും ശ്രദ്ധേയ വേഷങ്ങളിലെത്തുന്നുണ്ട്. 2017 ല്‍ ലോകസുന്ദരിപ്പട്ടം നേടിയ മാനുഷി ചില്ലര്‍ ഈ ചിത്രത്തിലൂടെ ബോളിവുഡില്‍ അരങ്ങേറ്റം കുറിക്കും. ചിത്രത്തില്‍ പ്രഥ്വിരാജ് ചൗഹാന്‍ രാജാവായാണ് അക്ഷയ് കുമാര്‍ വേഷമിടുന്നത്.
നിര്‍ഭയനും ശക്തനുമായ സാമ്രാട്ട് പ്രിഥ്വിരാജ് ചൗഹാന്റെ ജീവിതത്തെ ആസ്പദമാക്കി യാഷ് രാജ് ഫിലിംസാണ് ചിത്രം പുറത്തിറക്കുന്നത്. അക്ഷയ് കുമാറിന്റെ 52ാം ജന്മദിനത്തിലാണ് ചിത്രത്തിന്റെ പ്രഖ്യാപനം നടന്നത്.
ഘോറിലെ ക്രൂരനായ ഭരണാധികാരി മുഹമ്മദിനെതിരെ ധീരമായി പോരാടിയ ഇതിഹാസ യോദ്ധാവാണ് പ്രിഥ്വിരാജ് ചൗഹാന്‍. ഈ ടീസര്‍ ചിത്രത്തിന്റെ ആത്മാവിനെ ഉള്‍ക്കൊള്ളുന്നതാണ്. ഭയരഹിതനായ ഇതിഹാസ പോരാളി പ്രഥ്വിരാജ് ചൗഹാന്റെ ജീവിതമാണ് ചിത്രത്തിന്റെ ഇതിവൃത്തം. അദേഹത്തിന്റെ ധീരതയ്‌ക്കും ജീവിതത്തിനുമുള്ള സമര്‍പ്പണമാണീ സിനിമയെന്ന് അക്ഷയ് കുമാര്‍ പ്രതികരിച്ചു.
അദേഹത്തിന്റെ ജീവിതം തന്നെ ഒരു ഇതിഹാസമാണ്. രാജ്യത്തെ ധീരരായ പോരാളികളില്‍ ഒരാളാണ് അദേഹം. ലോകമെമ്പാടുമുള്ള ഇന്ത്യക്കാര്‍ ഈ ധീരഹൃദയനുള്ള പ്രണാമം അര്‍പ്പിക്കും. അദേഹത്തിന്റെ ജീവിത കഥ ഏറ്റവും ആധികാരികമായി അവതരിപ്പിക്കാന്‍ ഞങ്ങള്‍ ശ്രമിച്ചിട്ടുണ്ട്. പ്രഥ്വിരാജ് ചൗഹാന്റെ സമാനതകളില്ലാത്ത ധീരതയ്‌ക്കുള്ള ആദരാഞ്ജലിയാണ് ഈ ചിത്രമെന്നും അക്ഷയ് കുമാര്‍ കൂട്ടിച്ചേര്‍ത്തു.
യാഷ് രാജ് ഫിലിംസ് നിര്‍മ്മിക്കുന്ന ഏറ്റവും വലിയ ചരിത്ര സിനിമയാണ് ഇത്. ചാണക്യ എന്ന ടെലിവിഷന്‍ ഷോയും പിഞ്ചര്‍ എന്ന ചിത്രവും ചന്ദ്രപ്രകാശ് ദ്വിവേദി സംവിധാനം ചെയ്തിട്ടുണ്ട്. അടുത്ത വര്‍ഷം ജനുവരി 21 ന് ചിത്രം തീയേറ്ററുകളിലെത്തുകയെന്നാണ് പ്രതീക്ഷിക്കുന്നത്.
