കോഴിക്കോട് : വാടക കുടിശ്ശിക ആവശ്യപ്പെട്ടതിനെ തുടര്‍ന്ന് വ്യാജ പീഡനാരോപണം ഉന്നയിച്ച വനിതാ എസ്‌ഐയെ സസ്‌പെന്‍ഡ് ചെയ്തു. കോഴിക്കോട് മെഡിക്കല്‍ കോളേജ് അസിസ്റ്റന്റ് കമ്മിഷണര്‍ ഓഫീസിലെ വനിതാ എസ്‌ഐ സുഗുണവല്ലിയെയാണ് സസ്‌പെന്‍ഡ് ചെയ്തത്. കേസില്‍ ഫറക്ക് അസിസ്റ്റന്റ് കമ്മിഷണര്‍ എം.എം. സിദ്ദിഖിന്റെ അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് നടപടി.
കഴിഞ്ഞ നാലു മാസമായി സുഗുണവല്ലി വാടക നല്‍കാത്തതിനെ തുടര്‍ന്ന് പന്നിയങ്കരയില്‍ നിന്നുള്ള വീട്ടുടമ അവിടുത്തെ ഇന്‍സ്‌പെക്ടര്‍ക്ക് പരാതി നല്‍കിയിരുന്നു. തുടര്‍ന്ന് പരാതിയില്‍ അന്വേഷണം നടത്താനായി സിഐ വിളിപ്പിച്ചെങ്കിലും സുഗുണവല്ലി ആദ്യം ഹാജരായില്ല. എന്നാല്‍ നാല് ദിവസത്തിന് ശേഷം പന്നിയങ്കര സ്റ്റേഷനിലെത്തിയ സുഗുണവല്ലി വീട്ടുടമയുടെ മകളുടെ ഭര്‍ത്താവ് തന്റെ കൈയില്‍ കയറി പിടിച്ചെന്നാരോപിച്ച് പരാതി നല്‍കുകയായിരുന്നു.
ഇയാള്‍ തന്റെ കയ്യിലുണ്ടായിരുന്ന വിവാഹ മോതിരം ഊരിയെടുത്തെന്നും, വീടിന് നല്‍കിയ അഡ്വാന്‍സ് തുകയായ 70,000രൂപയും ചേര്‍ത്ത് ഒരു ലക്ഷം രൂപ വീട്ടുടമ തിരികെ നല്‍കാനുണ്ടെന്നും സുഗുണവല്ലിയുടെ പരാതിയില്‍ ആരോപിക്കുന്നുണ്ട്. ഇതിനെതുടര്‍ന്ന് പന്നിയങ്കര പോലീസ് വീട്ടുടമയുടെ മരുമകനെതിരേ പീഡനക്കുറ്റം ചുമത്തി കേസ് എടുത്തെങ്കിലും തുടരന്വേഷണത്തില്‍ പരാതി വ്യാജമാണെന്ന് കണ്ടെത്തുകയായിരുന്നു.
പന്നിയങ്കര പോലീസ് ഉന്നതവൃത്തങ്ങളെ അറിയിക്കുകയും ചെയ്തു. ഇതോടെയാണ് ഇവര്‍ക്കെതിരേ വകുപ്പ് തല അന്വേഷണത്തിന് സിറ്റി പോലീസ് കമ്മിഷണര്‍ക്ക് നിര്‍ദ്ദേശം നല്‍കിയത്.
