തിരുവനന്തപുരം: സംസ്ഥാനത്ത് ദീര്ഘനാളായി അടഞ്ഞുകിടക്കുന്ന സ്പെഷ്യല് സ്കൂളുകളും ബഡ്സ് സ്കൂളുകളും തുറക്കുന്നത് എല്ലാ കുട്ടികളെയും ഉള്ക്കൊള്ളിച്ചുകൊണ്ടു സ്കൂളുകള് സാധാരണ രീതിയിലേക്ക് വരുന്ന ഘട്ടത്തില് പരിഗണിക്കുമെന്ന് വിദ്യാഭ്യാസമന്ത്രി വി. ശിവന്കുട്ടി. നിയമസഭയിൽ പി.കെ. ബഷീറിന്റെ ശ്രദ്ധ ക്ഷണിക്കലിന് മറുപടി പറയുകയായിരുന്നു മന്ത്രി.
സംസ്ഥാനത്ത് ഏകദേശം 321 സ്പെഷ്യല് സ്കൂളുകള് പ്രവര്ത്തിക്കുന്നുണ്ട്. ഇതില് എന്ജിഒകള് നടത്തുന്ന സ്കൂളുകള്, ബഡ്സ് സ്കൂളുകള്, ദീനദയാല് ഡിസേബിള്ഡ് റീഹാബിലിറ്റേഷന് സ്കീം ഗ്രാന്റ് ലഭിക്കുന്ന സ്കൂളുകള് എന്നിവ ഉള്പ്പെടുന്നു. മാനസിക വെല്ലുവിളി നേരിടുന്ന കുട്ടികളുടെ പ്രതിരോധശേഷി കുറവാകാന് സാധ്യതയുള്ളതിനാലും വാക്സിനേഷന് കിട്ടിയിട്ടില്ലാത്തതിനാലും സാമൂഹ്യ അകലം പാലിക്കുക, മാസ്ക് ധരിക്കുക, സാനിറ്റൈസ് ചെയ്യുക എന്നീ പ്രതിരോധ പ്രവര്ത്തനങ്ങളില് ഒട്ടും തന്നെ വീഴ്ച വരാതെ മുന്കരുതലുകള് സ്വീകരിക്കേണ്ടതുണ്ട്. ഇത്തരത്തില് പകുതിയോളം സ്കൂളുകളില് ഹോസ്റ്റല് സൗകര്യം ലഭ്യമാണ്. അതിനാല് ഹോസ്റ്റല് തുറന്നു പ്രവര്ത്തിക്കാനുള്ള സാഹചര്യവും ഒരുക്കണം.
കൊവിഡ് പൂര്ണമായും നിയന്ത്രണ വിധേയമാകാത്ത സാഹചര്യം നിലനിന്നിരുന്നതിനാലാണ് പകുതി കുട്ടികള് വരുന്ന തരത്തില് സ്കൂളുകള് തുറന്നു പ്രവര്ത്തിച്ചത്. ആദ്യഘട്ടത്തിലെ പ്രവര്ത്തനം നിരീക്ഷിച്ച ശേഷം മാത്രമായിരിക്കും എല്ലാ കുട്ടികളെയും ഉള്ക്കൊള്ളിച്ചു സാധാരണ രീതിയിലേക്ക് മാറ്റുന്നത്. ആ ഘട്ടത്തില് മാനസിക വെല്ലുവിളി നേരിടുന്ന കുട്ടികളുടെ സ്കൂളുകള് തുറക്കുന്ന കാര്യവും പരിഗണിക്കും. മന്ത്രി പറഞ്ഞു.
