മണ്ണാര്‍ക്കാട്: ഇന്ത്യന്‍ രൂപയ്ക്ക് ഇരട്ടി വിദേശ കറന്‍സി വാഗ്ദാനം ചെയ്ത് തട്ടിപ്പ് മണ്ണാര്‍ക്കാട്ടും. രണ്ട് ലക്ഷത്തോളം രൂപ തട്ടിയെടുത്തതായി കാണിച്ച് ആര്യമ്പാവ് സ്വദേശി മണ്ണാര്‍ക്കാട് പോലീസില്‍ പരാതി നല്‍കി.
ആര്യമ്പാവില്‍ മൊബൈല്‍ കട നടത്തുന്നയാളാണ് പരാതിക്കാരന്‍. ഷോപ്പില്‍ റീചാര്‍ജ് ചെയ്യാനെത്തി രൂപയ്ക്ക് പകരം ദിനാര്‍ നല്‍കുകയായിരുന്നു. ഇത് എവിടെ നിന്നാണ് ലഭിച്ചതെന്ന് അന്വേഷിച്ചപ്പോള്‍ ദിനാര്‍ മാറ്റി തന്നാല്‍ ലാഭം നല്‍കാമെന്ന് അറിയിക്കുകയായിരുന്നു. 1,90,000 രൂപ നല്‍കിയാല്‍ നാല് ലക്ഷം രൂപ മൂല്യമുള്ള വിദേശ കറന്‍സി നല്‍കാമെന്നാണത്രേ അറിയിച്ചത്. ഇത് വിശ്വസിച്ച് ഭാര്യയുടെ സ്വര്‍ണമടക്കം പണയപ്പെടുത്തി പരാതിക്കാരന്‍ പണം നല്‍കി. പകരം ലഭിച്ച ബാഗില്‍ പത്രങ്ങള്‍ ചുരുട്ടി വെച്ചതാണ് കണ്ടതത്രെ.
പഴേരി കോംപ്ലക്സില്‍ നിന്നും കോടതിപ്പടിയിലേക്ക് പോകുന്ന ഇടവഴിയിലായിരുന്നു ഇടപാട്. തട്ടിപ്പു നടത്തിയവരെക്കുറിച്ച് പരാതിക്കാരനും കൃത്യമായ ധാരണയില്ല. ആര്യമ്പാവ് സ്വദേശിയുടെ പരാതിയില്‍ പോലീസ് കേസെടുത്ത് അന്വേഷണം ആരംഭിച്ചതായി എസ്ഐ കെ.ആര്‍. ജസ്റ്റിന്‍ അറിയിച്ചു. രണ്ടുപേരുണ്ടെന്നാണ് സൂചന. തട്ടിപ്പ് നടന്ന സ്ഥലത്തെ സിസിടിവി ദൃശ്യങ്ങള്‍ പരിശോധിച്ചുവരുന്നതായി എസ്ഐ പറഞ്ഞു.
ഇക്കഴിഞ്ഞ 22ന് പാലക്കാട് കെഎസ്ആര്‍ടിസി സ്റ്റാന്‍ഡില്‍ രണ്ടംഗ സംഘം മണ്ണാര്‍ക്കാട് സ്വദേശിയുടെ 11 ലക്ഷം തട്ടിയെടുത്തിരുന്നു. യുഎഇ ദിര്‍ഹം വാഗ്ദാനം ചെയ്തായിരുന്നു തട്ടിപ്പ്. കരിങ്കല്ലത്താണിയില്‍ മൊബൈല്‍ ഷോപ്പ് നടത്തുന്നയാളാണ് തട്ടിപ്പിന് ഇരയായത്. സംഭവത്തില്‍ സൗത്ത് പോലീസ് അന്വേഷണം നടത്തിവരുന്നു.
കഴിഞ്ഞ മാസം കാസര്‍കോടുണ്ടായ സമാന സംഭവത്തില്‍ ജാര്‍ഖണ്ഡ് സ്വദേശികളായ മൂന്നുപേരെ അറസ്റ്റു ചെയ്തിരുന്നു. മൊബൈല്‍ ഷോപ്പുകള്‍ കേന്ദ്രീകരിച്ചാണ് തട്ടിപ്പ്.
