കോഴിക്കോട്: കാലാവസ്ഥാ വ്യതിയാനം പ്രതിരോധിക്കുന്നതിനുള്ള കേന്ദ്ര ഫണ്ട് വിനിയോഗിക്കുന്നതില് സംസ്ഥാനം അലംഭാവം കാട്ടുന്നുവെന്ന് വിവരാവകാശ രേഖ. വനങ്ങളുടെ ഗുണനിലവാരവും വിസ്തീര്ണ്ണവും വര്ധിപ്പിക്കാന് ആരംഭിച്ച ദേശീയ പദ്ധതിയായ ഗ്രീന് ഇന്ത്യ മിഷനു കേന്ദ്ര സര്ക്കാര് 2015-16 മുതല് 2020-21 വരെ സംസ്ഥാനത്തിന് നല്കിയത് 25.47 കോടി രൂപ. പക്ഷെ ചെലവിട്ടത് 9.88 കോടി മാത്രം. കൊച്ചി സ്വദേശിയായ വിവരാവകാശ പ്രവര്ത്തകന് കെ. ഗോവിന്ദന് നമ്പൂതിരിക്ക് നല്കിയ മറുപടിയിലാണ് കേന്ദ്ര വനം, പരിസ്ഥിതി മന്ത്രാലയം ഇക്കാര്യം വ്യക്തമാക്കിയത്.
കേരളം ഉള്പ്പടെ 15 സംസ്ഥാനങ്ങള്ക്കാണ് കേന്ദ്ര ഫണ്ട് അനുവദിച്ചത്. ഇതില് മിസോറാം, സിക്കിം, പഞ്ചാബ്, മണിപ്പൂര്, കര്ണാടക, മധ്യപ്രദേശ്, ഛത്തീസ്ഗഡ് സംസ്ഥാനങ്ങള് ഫണ്ട് പൂര്ണമായും ചിലവഴിച്ചുവെന്നു വിവരാവകാശ മറുപടിയില് വ്യക്തമാക്കുന്നു. അതേസമയം ബംഗാളും ഹിമാചല്പ്രദേശും ജമ്മുകശ്മീരും ഇതുവരെ വിനിയോഗ സര്ട്ടിഫിക്കറ്റ് സമര്പ്പിച്ചിട്ടില്ല.
രാജ്യത്ത് കുറഞ്ഞുവരുന്ന വനവിസ്തൃതി പുനഃസ്ഥാപിക്കുകയും മെച്ചപ്പെടുത്തുകയും കാലാവസ്ഥാ വ്യതിയാനം പ്രതിരോധിക്കാനുള്ള നടപടികളുമാണ് ഗ്രീന് ഇന്ത്യ മിഷന് (ജിഐഎം) ലക്ഷ്യമിടുന്നത്. ജൈവവൈവിധ്യം, ജലം, ജൈവവസ്തുക്കള്, കണ്ടല്ക്കാടുകള്, തണ്ണീര്ത്തടങ്ങള്, നിര്ണായക ആവാസവ്യവസ്ഥകള് മുതലായവ സംരക്ഷിക്കുകയാണ് കാലാവസ്ഥാ വ്യതിയാനത്തെ പ്രതിരോധിക്കാനുള്ള ദേശീയ പ്രവര്ത്തന പദ്ധതി (എന്എപിസിസി) പ്രകാരം വിവരിച്ച എട്ട് ദൗത്യങ്ങളില് ഒന്നായ മിഷന്റെ പ്രധാന ലക്ഷ്യങ്ങള്.
രണ്ടു മഹാപ്രളയങ്ങള് സംഭവിച്ചതിന്റെ ദുരിതങ്ങളും വെല്ലുവിളികളും നിലനില്ക്കുന്ന സാഹചര്യത്തിലാണ് കാലാവസ്ഥാ വ്യതിയാനം ഉയര്ത്തുന്ന പാരിസ്ഥിതിക വെല്ലുവിളികളെ പ്രതിരോധിക്കുന്നതിനുള്ള ഫണ്ട് സംസ്ഥാനം ഫലപ്രദമായി ഉപയോഗിക്കാതിരുന്നത്.
