ന്യൂദല്ഹി : അഴിമതിക്കെതിരെ ശബ്ദിക്കാനുള്ള ഇച്ഛാശക്തി മുന് കാല സര്ക്കാരിനില്ലായിരുന്നെന്ന് കോണ്ഗ്രസ് ഭരണത്തെ രൂക്ഷമായി വിമര്ശിച്ച് പ്രധാനമന്ത്രി നരേന്ദ്രമോദി. ഇന്ന് കേന്ദ്രം ഭരിക്കുന്ന ബിജെപിക്ക് അഴിമതിയെ അതിജീവിക്കാനുള്ള രാഷ്ട്രീയ ഇച്ഛാശക്തിയുണ്ട് എന്നാല് കഴിഞ്ഞ സര്ക്കാരിനെ നയിച്ചവര് അഴിമതിയില് പങ്കാളികളായിരുന്നു. കേന്ദ്ര വിജിലന്സ് കമ്മീഷന്റേയും സിബിഐയുടെയും സംയുക്തയോഗത്തില് ഓണ്ലൈന് വഴി പങ്കെടുക്കവേയാണ് മോദിയുടെ ഈ വിമര്ശനം.
സുതാര്യമായ ഭരണമാണ് ഇപ്പോഴുള്ളത്. രാജ്യത്തിന് അതാണ് ആവശ്യം. അഴിമതി ഒരിക്കലും വെച്ചുപൊറുപ്പിക്കില്ല. മുന്കാല സര്ക്കാരിന് അഴിമതിക്കെതിരെ ശബ്ദിക്കാന് സാധിച്ചിരുന്നില്ല. സാധാരണക്കാരെ പിഴിയുന്ന നടപടിക്ക് അറുതി വരുത്തും. സൈബര് കുറ്റകൃത്യങ്ങള് ഇനിയും പൂര്ണ്ണമായി തടയാനായിട്ടില്ല. ഇക്കാര്യത്തില് കൂടുതല് ജാഗ്രത പുലര്ത്തണമെന്നും പ്രധാനമന്ത്രി യോഗത്തില് വ്യക്തമാക്കി.
രാജ്യത്തു നിന്നും അഴിമതി തുടച്ചു നീക്കുന്നതിനായി കഴിഞ്ഞ ഏഴ് വര്ഷത്തോളമായി തന്റെ സര്ക്കാര് അശ്രാന്ത പരിശ്രമം നടത്തി വരികയാണ്. സര്ക്കാര് ആവിഷ്കരിക്കുന്ന പദ്ധതികളുടെ ഗുണങ്ങള് ഇടനിലക്കാരനില്ലാതെ സാധാരണക്കാരിലേക്ക് നേരിട്ട് ലഭ്യമാകുന്ന സ്ഥിതിയിലേക്ക് ഇന്ന് രാജ്യം മാറിക്കഴിഞ്ഞു. അഴിമതി നടത്തുന്ന് ചെറുതോ വലുതോ ആകട്ടെ സാധാരണക്കാരുടെ അവകാശങ്ങളാണ് ഇതിലൂടെ നഷ്ടപ്പെടുന്നത്. രാജ്യത്തെ വികസനത്തിനും ഇത് തടസ്സം സൃഷ്ടിക്കുമെന്നും പ്രധാനമന്ത്രി കൂട്ടിച്ചേര്ത്തു.
