കോഴിക്കോട്: ശബരിമല ക്ഷേത്രവും ആചാരങ്ങളും തകര്‍ക്കാന്‍ വേണ്ടി വ്യാജരേഖ ചമച്ചവര്‍ക്കെതിരെ നടപടി സ്വീകരിക്കണമെന്ന് ബിജെപി സംസ്ഥാന ജനറല്‍ സെക്രട്ടറി എം.ടി. രമേശ്. ഇതിന് ഗൂഢാലോചന നടത്തിയവരെ കണ്ടെത്താന്‍ ഉന്നതതല അന്വേഷണം നടത്തണമെന്നും മാരാര്‍ജി ഭവനില്‍ നടന്ന വാര്‍ത്താസമ്മേളനത്തില്‍ ബിജെപി ആവശ്യപ്പെട്ടു. ശബരിമലയുടെ അസ്തിത്ത്വത്തെ ചോദ്യം ചെയ്യുന്ന രീതിയിലുള്ള രേഖയാണ്, ശബരിമല പ്രക്ഷോഭത്തെ അട്ടിമറിക്കാനുള്ള ഒരു ഉപാധിയാക്കി ന്യൂസ് ട്വന്റി ഫോര്‍ ചാനല്‍ പുറത്ത് വിട്ടത്.
മോണ്‍സന്‍ മാവുങ്കല്‍ വ്യാജമായ ചെമ്പോല തകിട് ഉണ്ടാക്കിയത് ശബരിമല ക്ഷേത്രത്തെ തകര്‍ക്കുക എന്ന ലക്ഷ്യത്തിലായിരുന്നു. ശബരിമല പ്രക്ഷോഭത്തില്‍ ഒരുമിച്ച് നിന്ന കേരളത്തിലെ ഹിന്ദു സമൂഹത്തിലെ വിശ്വാസികളുടെ ഭാഗത്ത് വിള്ളലുണ്ടാക്കി സാമുദായിക സംഘര്‍ഷങ്ങള്‍ ഉണ്ടാക്കുക എന്നതായിരുന്നു ഈ രേഖ സൃഷ്ടിച്ചവരുടെ ലക്ഷ്യം. മോണ്‍സന്റെ തുറന്നുപറച്ചിലോടെ ഗൂഢാലോചന പുറത്ത് വരികയാണ്.
മറ്റെല്ലാം രേഖകളും സാമ്പത്തിക ലാഭത്തിനു വേണ്ടി കെട്ടിപ്പടുത്തവയാണ്. എന്നാല്‍ ഇങ്ങനെ ഒരു വ്യാജരേഖ നിര്‍മ്മിതിക്ക് പുറകില്‍ സാമ്പത്തികലാഭം മാത്രമായിരുന്നില്ല, അതിനപ്പുറത്ത് ഇടത് ജിഹാദി അജണ്ട ഉണ്ടായിരുന്നു. ആ അജണ്ടയുടെ താളത്തിനൊത്ത് തുള്ളുകയാണ് മറ്റുള്ളവര്‍ ചെയ്തത്. മുഖ്യമന്ത്രിയടക്കം ഈ വ്യാജരേഖയിലെ കാര്യങ്ങള്‍ ജനങ്ങള്‍ക്ക് മുന്‍പില്‍ അവതരിപ്പിച്ചു. ഭരണകൂടം പോലും വ്യാജ രേഖയുടെ പുറകെ നടന്ന് കോടിക്കണക്കിനു വിശ്വാസികളെ വെല്ലുവിളിക്കുകയും അവരെ അപമാനിക്കുകയുമാണ് ചെയ്തത്. ആ ഗുഢാലോചനയില്‍ പങ്കാളികളാണ് മോണ്‍സണ്‍ മാവുങ്കലും ഇടതു ജിഹാദി സംഘടനകളും ഏറ്റെടുത്ത് മാധ്യമങ്ങളും സ്വാഗതം ചെയ്ത മുഖ്യമന്ത്രിയുമെല്ലാം.
എങ്ങനെയാണ് മുഖ്യമന്ത്രിയുടെ ഓഫീസില്‍ ഇത്തരക്കാര്‍ക്ക് ഇടനിലക്കാര്‍ ഉണ്ടാവുന്നത്. പോലീസ് മേധാവി ഇത്തരം ആളുകളെ സംരക്ഷിക്കുന്നതും പ്രമുഖ രാഷ്‌ട്രീയനേതാക്കളുമായി ഇയാള്‍ക്ക് ബന്ധമുണ്ടായത് എങ്ങനെയാണ്. ഇപ്പോള്‍ നടക്കുന്ന ക്രൈംബ്രാഞ്ച് അന്വേഷണം കൊണ്ട് സത്യാവസ്ഥ പുറത്തു വരികയില്ല. കേന്ദ്ര ഏജന്‍സിയെ അന്വേഷണം ഏല്‍പ്പിക്കാന്‍ സംസ്ഥാന സര്‍ക്കാര്‍ തയ്യാറാകണം ബിജെപി ആവശ്യപ്പെട്ടു. വാര്‍ത്താസമ്മേളനത്തില്‍ ജില്ലാ ജനറല്‍ സെക്രട്ടറി എം. മോഹനന്‍, ജില്ലാ വൈസ് പ്രസിഡന്റ് അഡ്വ: കെ.വി. സുധീര്‍ എന്നിവര്‍ പങ്കെടുത്തു.
