ദുബൈ: വാക്സിനെടുത്ത താമസ വിസക്കാര്ക്ക് മടങ്ങിയെത്താമെന്ന് യുഎഇ. ഇന്ത്യ ഉള്പെടെ ആറു രാജ്യങ്ങള്ക്കായാണ് യുഎഇ വാതില് തുറന്നത്. തിരികെ എത്താനായി ആഗസ്റ്റ് അഞ്ച് മുതല് യു.എ.ഇ ഫെഡറല് അതോറിറ്റിയുടെ (ഐ.സി.എ) വെബ്സൈറ്റ് വഴി അപേക്ഷ നല്കാം. ഇന്ത്യ,പാകിസ്ഥാന്, ശ്രീലങ്ക, നേപ്പാള് നൈജീരിയ, ഉഗാണ്ട എന്നീ രാജ്യങ്ങളില് നിന്നുളളവര്ക്ക് രാജ്യത്തേക്ക് പ്രവേശിക്കാമെന്നാണ് എമര്ജന്സി ക്രൈസിസ് ആന്റ് ഡിസാസ്റ്റര് മാനേജ്മെന്റ് അതോറിറ്റിയുടെ ട്വീറ്റ് വ്യക്തമാക്കുന്നത്.
ആരോഗ്യ മേഖലയില് പ്രവര്ത്തിക്കുന്ന ഡോക്ടര്മാര്, നഴ്സുമാര്, ടെക്നീഷ്യന്, വിദ്യാഭ്യാസ മേഖലയില് പ്രവര്ത്തിക്കുന്നവര്ക്ക് വാക്സിനെടുത്തില്ലെങ്കിലും യാത്ര ചെയ്യാന് അനുമതി നല്കിയിട്ടുണ്ട്. വിദ്യാര്ഥികള്, മാനുഷിക പരിഗണന അര്ഹിക്കുന്ന കേസുകള്, സര്ക്കാര് ജീവനക്കാര്, ചികിത്സ അത്യാവശ്യമുള്ളവര് എന്നിവര്ക്കും ഇളവുണ്ട്. തിരികെ എത്തുന്നവര്ക്ക് കാലാവധിയുളള താമസവിസയുണ്ടായിരിക്കണം. യുഎഇ അംഗീകരിച്ച വാക്സിന്റെ രണ്ട് ഡോസും എടുത്തവരായിരിക്കണം വാക്സിന്റെ രണ്ടാം ഡോസ് എടുത്ത് കഴിഞ്ഞ് 14 ദിവസം കഴിഞ്ഞിരിക്കണം. വാക്സിനേഷന് സര്ട്ടിഫിക്കറ്റ് കൈയില് കരുതണം തുടങ്ങിയ നിബന്ധനകളാണ് യുഎഇ മുന്നോട്ട് വെച്ചിരിക്കുന്നത്.
