ന്യൂദല്ഹി: പ്രധാനമന്ത്രി വ്യാഴാഴ്ച പങ്കുവെച്ച വീഡിയോ അത്യപൂര്വ്വതകൊണ്ടും ദൃശ്യത്തിലെ നിഷ്കളങ്കതകൊണ്ടും വ്യത്യസ്തമായി ഗുജറാത്തിലെ ഭാവ് നഗര് ജില്ലയില് കൃഷ്ണമൃഗങ്ങള്ക്കൊരുക്കിയ പ്രത്യേക ദേശീയ ഉദ്യാനത്തില് റോഡ് മുറിച്ചുകടക്കുന്ന കൃഷ്ണമൃഗങ്ങളുടെ വീഡിയോയാണ് പ്രധാനമന്ത്രി ട്വിറ്ററില് പങ്കുവെച്ചത്.
ഗുജറാത്ത് ഇന്ഫര്മേഷന് വകുപ്പിന്റെ വീഡിയോയാണ് മോദി ട്വിറ്ററില് പങ്കുവെച്ചത്. 3000ല് പരം മാനുകളാണ് ഒറ്റയടിക്ക് റോഡ് മുറിച്ച് കടക്കുന്നത്. വംശനാശം നേരിട്ടുകൊണ്ടിരിക്കുന്നതിനാല് സവിശേഷ സംരക്ഷിതവിഭാഗത്തില്പ്പെടുന്നതാണ് ബ്ലാക്ബക്കുകള് എന്നറിയപ്പെടുന്ന ഈ കൃഷ്ണമൃഗങ്ങള്.
1972ലെ വന്യജീവി നിയമപ്രകാരം ഇവയെ വേട്ടയാടുന്നത് നിരോധിച്ചിട്ടുണ്ട്. സിനിമാതാരം സല്മാന്ഖാന് കൃഷ്ണമൃഗത്തെ വേട്ടയാടിയ കേസില് കോടതി വിചാരണ നേരിടേണ്ടിവന്നിരുന്നു.
