കരമന: തിരുവനന്തപുരം കോര്‍പറേഷന്‍ സ്വന്തമായി വാങ്ങിയ രണ്ട് ഹിറ്റാച്ചികള്‍ തുരുമ്പെടുത്ത് ചവര്‍കൂനയ്‌ക്കിടയില്‍ കിടന്ന് നശിക്കുന്നു. എഴുപതുലക്ഷം രൂപ മുടക്കിയാണ് കോര്‍പറേഷന്‍ രണ്ടും വാങ്ങിയത്. എന്നാല്‍ കുറച്ചു മാസങ്ങളായി രണ്ട് ഹിറ്റാച്ചികളും കാണാനില്ലായിരുന്നു അന്വേഷിച്ചു ചെന്ന് ബിജെപി കൗണ്‍സിലര്‍ കരമന അജിത്ത് അവ രണ്ടും കണ്ടെത്തിയത് എരുമക്കുഴിയിലെ ചവര്‍കൂനകള്‍ക്കിടയിലാണ്.
നഗരസഭയുടെ കാണാതായ ഹിറ്റാച്ചികള്‍ എവിടെയെന്ന് അന്വേഷിച്ചിറങ്ങിയ അദേഹത്തിന് ഒരിടത്തുനിന്നും തൃപ്തികരമായ മറുപടി ലഭിച്ചില്ല. ഹിറ്റാച്ചികള്‍ എവിടെ പോയെന്ന് ആര്‍ക്കും അറിയില്ല. തുടര്‍ന്ന് നടത്തിയ തിരച്ചിലിലാണ് ഹിറ്റാച്ചികള്‍ രണ്ടും തകരാറിലായി ഗ്യാരേജില്‍ നന്നാക്കാന്‍ ഇട്ടിരിക്കുന്നു. തിരുവനന്തപുരം നഗരസഭയിലെ നൂറ് വാര്‍ഡുകളിലും എന്തെങ്കിലും ആവശ്യം വന്നാല്‍ സാധാരണ ഉപയോഗിക്കുന്നത് ഈ രണ്ട് ഹിറ്റാച്ചികളാണെന്ന് കരമന അജിത്ത് ചൂണ്ടിക്കാട്ടുന്നു. ഇവ അറ്റകുറ്റപ്പണി ചെയ്യാതെ നശിപ്പിച്ചാല്‍ ഹിറ്റാച്ചികള്‍ സ്വന്തമായുള്ള ചില സിപിഎം നേതാക്കളുടെ പക്കല്‍ നിന്നും മണിക്കൂറിന് ആയിരങ്ങള്‍ വാടക നല്‍കി എടുക്കാമെന്നും ഇത് കടുത്ത അഴിമതിയാണെന്നും അജിത്ത് ആരോപിക്കുന്നു.
പകല്‍ക്കൊള്ളയാണ് സിപിഎം മേയറുടെ നേതൃത്വത്തില്‍ നഗരസഭയില്‍ അരങ്ങേറുന്നത്. നഗരസഭ ചില്‍ഡ്രന്‍സ് പാര്‍ക്കല്ല. ഉത്തരവാദിത്വത്തോടെ ജനങ്ങളുടെ സ്വത്ത് കൈകാര്യം ചെയ്യേണ്ട അധികാരകേന്ദ്രമാണെന്നും കരമന അജിത്ത് ഫേസ്ബുക്ക് പോസ്റ്റില്‍ പറയുന്നു.
ഫേസ്ബുക്ക് പോസ്റ്റിന്റെ പൂര്‍ണരൂപം:
70 ലക്ഷത്തിന്റെ ‘കുട്ടിക്കളി’.
തിരുവനന്തപുരം നഗരസഭയ്‌ക്ക് സ്വന്തമായി രണ്ട് ഹിറ്റാച്ചിയുണ്ട്.. ഏതാണ്ട് 70 ലക്ഷം രൂപ മുടക്കിയാണ് രണ്ടും വാങ്ങിയത്. കുറെ മാസങ്ങളായി രണ്ടും കാണാനില്ല..
അന്വേഷിക്കുംമ്പോള്‍ ഒരിടത്ത് നിന്നും തൃപ്തികരമായ മറുപടി അല്ല എനിക്ക് ലഭിച്ചത്.. എവിടെ ചോദിച്ചാലും ആര്‍ക്കും അറിയില്ല, അവിടെ കാണും, ഇവിടെ കാണും, എവിടെയോ കാണും എന്നൊക്കെയുള്ള മറുപടികളാണ് കിട്ടിത്…
എന്തായാലും അതിന്റെ പുറകേ അന്വേഷിച്ചിറങ്ങാമെന്ന് ഞാനും കരുതി.. കാരണം AKG center ലെ LKG കുട്ടികള്‍ക്ക് മേയര്‍ കസേരയിലിരുന്ന് കളിച്ച് നശിപ്പിക്കാനുള്ളതല്ലല്ലോ ജനങ്ങളുടെ നികുതിപ്പണത്തില്‍ നിന്ന് വാങ്ങുന്ന ലക്ഷങ്ങളുടെ മുതലുകള്‍.
അവസാനമായി കിട്ടിയ വിവരം രണ്ടും തകരാറിലായി ഗാരേജില്‍ നന്നാക്കാനിട്ടിരിക്കുന്നു എന്നാണ്… അത് നുണയാണെന്ന് മനസ്സിലായി… ഞാന്‍ വീണ്ടും അന്വേഷിച്ചു…
ഫോര്‍ട്ട് ഗ്യാരേജില്‍ അന്വേഷിച്ചു… അവിടെ ഇല്ല….
അങ്ങനെ ഇന്ന് അവ രണ്ടും ഞാന്‍ കണ്ടെത്തി… എരുമക്കുഴിയിലെ ചവര്‍ കൂനകള്‍ക്കിടയിലുണ്ട് രണ്ടും…
ഇതാണോ ഗ്യാരേജ്… !
ഇതിനെ ഇങ്ങനെയിട്ട് തുരുംമ്പെടുപ്പിക്കുന്നത് എന്തിനാണെന്ന് പൊതുജനം കൂടി അറിയണം…
അതായത് തിരുവനന്തപുരം കോര്‍പറേഷനിലെ വാര്‍ഡുകളില്‍ ഹിറ്റാച്ചി ആവശ്യം വന്നാല്‍ സാധാരണ ഉപയോഗിക്കുന്നത് ഈ രണ്ട് സ്വന്തം ഹിറ്റാച്ചികളാണ്… ഇത് ഇല്ലാത്തപക്ഷം ഹിറ്റാച്ചികള്‍ സ്വന്തമായുള്ള ചില സിപിഎം നേതാക്കളുടെ അടുത്ത് നിന്നും മണിക്കൂറിന് ആയിരങ്ങള്‍ വാടക നല്‍കി എടുക്കും. അപ്പോള്‍ ഹിറ്റാച്ചി എന്നെന്നേക്കും കേടായി കിടന്നാല്‍ ആവശ്യത്തിനും അനാവശ്യത്തിനും ഹിറ്റാച്ചി വാടകയ്‌ക്കെടുത്തു എന്ന് കണക്കെഴുതി സിപിഎം കാരെ പരിപോഷിപ്പിക്കാം….
പകല്‍ക്കൊള്ളയാണ് മേയറുടെ നേതൃത്വത്തില്‍ നഗരസഭയില്‍ അരങ്ങേറുന്നത്.
ഹോ.. എന്ത് ഭരണമാണ് മേയര്‍ കുഞ്ഞ് നടത്തുന്നത്… നഗരസഭ ചില്‍ഡ്രന്‍സ് പാര്‍ക്കല്ലെന്നും ഉത്തരവാദിത്വത്തോടെ ജനങ്ങളുടെ സ്വത്ത് കൈകാര്യം ചെയ്യേണ്ട സ്ഥലമാണെന്നും വിനീതമായി ഞാനൊന്നു ഓര്‍മ്മിപ്പിക്കുന്നു.
