കൊല്‍ക്കത്ത : തെരഞ്ഞെടുപ്പ് ഫലപ്രഖ്യാപനത്തിന് പിന്നാലെ ബിജെപി പ്രവര്‍ത്തകര്‍ക്ക് നേരെ ആക്രമണം അഴിച്ചുവിട്ട് തൃണമൂല്‍ കോണ്‍ഗ്രസ്. സംസ്ഥാനത്ത് വിവിധയിടങ്ങളിലായി ടിഎംസി നേതാക്കള്‍ നടത്തിയ ആക്രമണങ്ങളില്‍ ആറ് ബിജെപി പ്രവര്‍ത്തകര്‍ കൊല്ലപ്പെട്ടു. ബംഗാളില്‍ തെരഞ്ഞെടുപ്പ് പ്രഖ്യാപിച്ചത് മുതല്‍ ബിജെപി പ്രവര്‍ത്തകര്‍ക്ക് നേരെ തൃണമൂല്‍ പ്രവര്‍ത്തകര്‍ നിരന്തരം ആക്രമണങ്ങള്‍ അഴിച്ചുവിടുകയായിരുന്നു.
ഫലപ്രഖ്യാപനത്തിന് ശേഷവും ടിഎംസിയുടെ ആക്രമണങ്ങള്‍ ഒന്നുകൂടി വര്‍ധിച്ചു. വോട്ടെണ്ണല്‍ ദിനത്തിലും, തിങ്കളാഴ്ചയും തൃണമൂല്‍ ഭീകരതയ്‌ക്കായിരുന്നു ബംഗാള്‍ ജനത സാക്ഷ്യം വഹിച്ചത്. ബിജെപി പ്രവര്‍ത്തകരുടെ വീടുകള്‍ക്ക് നേരെയും വ്യാപക ആക്രമണം നടന്നു. ബിജെപി ഓഫീസുകള്‍ക്ക് നേരെ ആക്രമണമുണ്ടായി.
ഇതിനെ തുടര്‍ന്ന് ബംഗാള്‍ ഗവര്‍ണര്‍ ജഗ്ദീപ് ധന്‍കര്‍ സംസ്ഥാന പോലീസ് മേധാവിയെ നേരിട്ട് വിളിച്ചു വരുത്തി സ്ഥിതിഗതികള്‍ വിലയിരുത്തി അടിയന്തിര റിപ്പോര്‍ട്ട് തേടി. എന്നാല്‍ താ്ന്‍ നേരിട്ട് റിപ്പോര്‍ട്ട് ആവശ്യപ്പെട്ടിട്ടും നടപടിയൊന്നുമായില്ലെന്ന് ഗവര്‍ണര്‍ പോലീസിനെതിരെ രൂക്ഷ വിമര്‍ശനം ഉയര്‍ത്തി.
സംസ്ഥാനത്തെ ആക്രമണങ്ങളുടെ പശ്ചാത്തലത്തില്‍ കേന്ദ്ര ആഭ്യന്തര മന്ത്രാലയവും റിപ്പോര്‍ട്ട് തേടി. ബിജെപി ദേശീയ അദ്ധ്യക്ഷന്‍ ജെ.പി നദ്ദ ഇന്ന് ബംഗാള്‍ സന്ദര്‍ശിക്കുന്നുണ്ട്. തൃണമൂല്‍ ആക്രമണത്തില്‍ പ്രതിഷേധിച്ച് ബുധനാഴ്ച രാജ്യവ്യാപകമായി ധര്‍ണ്ണനടത്തുമെന്ന് ബിജെപി അറിയിച്ചു.
