അഹമ്മദാബാദ്: പാകിസ്താൻ ചാര സംഘടനയായ ഐഎസ്ഐ ഗുജറാത്തിൽ ഭീകരാക്രമണങ്ങൾ നടത്താന് നീക്കമിട്ടിരുന്നതായി ക്രൈംബ്രാഞ്ച് കണ്ടെത്തി.
ഈ നീക്കം തകര്ത്ത ക്രൈംബ്രാഞ്ച് മൂന്ന് ഐഎസ്ഐ പ്രവര്ത്തകരെ അറസ്റ്റ് ചെയ്തു. ഭൂപേന്ദ്ര വൻസാര, അനിൽ ഖാതിക്, അങ്കിത് പാൽ എന്നിവരെയാണ് പിടികൂടിയത്. ഇവര് അഹമ്മദാബാദ് കേന്ദ്രീകരിച്ച് ഭീകരാക്രമണത്തിന് പദ്ധതിയിട്ടുവരികയായിരുന്നു. മൂന്ന് പേരും കലൂപൂരിൽ കടകൾക്ക് തീയിട്ട സംഭവത്തിലെ പ്രതികളാണ്.
ഈയിടെ ഗുജറാത്തില് ഒരു സുപ്രധാന ഐഎസ്ഐ ഏജന്റ് ക്രൈംബ്രാഞ്ചിന്റെ വലയില് കുടുങ്ങിയിരുന്നു. ഇയാളെ ചോദ്യം ചെയ്തപ്പോഴാണ് മൂന്ന് പേര് ഭീകരാക്രമണം നടത്താന് പദ്ധതിയിട്ടുകൊണ്ടിരിക്കുന്നതായി അറിഞ്ഞത്. തുടർന്ന് ഇവരെ അതിഗൂഢനീക്കത്തിലൂടെ പിടികൂടി. ഇന്ത്യൻ ശിക്ഷാ നിയമത്തിലെ വിവിധ വകുപ്പുകളും നിയമവിരുദ്ധ വിരുദ്ധ പ്രവർത്തനങ്ങൾ തടയൽ നിയമ പ്രകാരവുമാണ് ഇവരുടെ അറസ്റ്റ് രേഖപ്പെടുത്തിയത്.
പണത്തിന് വേണ്ടിയാണ് ഇവർ ചാരസംഘടനയുടെ നിർദ്ദേശ പ്രകാരം പ്രവർത്തിക്കുന്നത്. കലൂപൂരിലെ കടകൾക്ക് തീയിടുന്നതിനായി ഐഎസ്ഐയിൽ നിന്നും ദുബായില് നിന്നും 1.5 ലക്ഷം രൂപ ഇവർക്ക് ലഭിച്ചിട്ടുണ്ടെന്നും ക്രൈംബ്രാഞ്ച് വ്യക്തമാക്കി. മാര്ച്ച് 20 നാണ് മൂന്നുപേരടങ്ങുന്ന സംഘം കടകൾക്ക് തീയിട്ടത്. ഇതുമായ് ബന്ധപ്പെട്ടുള്ള അന്വേഷണം പുരോഗമിക്കുന്നതിനിടെയാണ് പ്രതികൾ അറസ്റ്റിലായത്.
