ശ്രീരാമനും ശ്രീകൃഷ്ണനുമൊക്കെ നമ്മള് കുറ്റവും കുറവും കണ്ടെത്തുമ്പോഴും ഹനുമാന് നമ്മള്ക്കു മുമ്പില് കളങ്കരഹിതനാണ്. ഹനുമാന്റെ കുസൃതിക്കഥകള് നമ്മള് കേട്ടിരിക്കും. പക്ഷേ അതൊന്നും കളങ്കങ്ങളാണെന്നു പറയാനാവില്ല. സ്വന്തം കഴിവുകള് മറന്നുപോയ ആളല്ലേ ഹനുമാന് എന്നൊരു ചോദ്യമുയര്ന്നേക്കാം.
കളങ്കമെന്നതിലുപരി ഹനുമാന് അതൊരു അനുഗ്രഹമാണ്. എന്തെന്നാല് സര്വദേവസ്വരൂപനാണ് ഹനുമാന്. എങ്കിലും അദ്ദേഹം അറിയപ്പെട്ടതും മഹത്വവല്കരിക്കപ്പെട്ടതും ‘ദാസ്യഭക്തി’ യുടെ ഉദാഹരണമായാണ്. ദാസ്യഭക്തിയുടെ പൂര്ണതയ്ക്ക് ബലം നല്കാനാവാം ഹനുമാന് സ്വാമിയുടെ ‘മറവി’ യെ പ്രത്യേകം സൂചിപ്പിക്കുന്നത്. സ്വന്തം കഴിവുകളെ മറക്കുക എന്നത് ദാസ്യഭക്തിക്ക് അധികാരിത്വമായി വര്ത്തിച്ചു.
ഇങ്ങനെയുള്ള ഹനുമാന് ചതുര്വിധ പുരുഷാര്ഥങ്ങള് നല്കാന് പ്രാപ്തനാണ്. അതിനാല് മനസ്സ് ശുദ്ധമാക്കി ഹനുമാനെ വര്ണിക്കുന്നതിന്റെ ഫലം ധര്മ്മാര്ഥകാമമോക്ഷമാകിയ ചതുര്വിധ പുരുഷാര്ഥങ്ങളാണ്.
ബുദ്ധിഹീന് തനു ജാനികേ
സുമിരൗ പവന കുമാര്
ബലബുദ്ധി ബിദ്യ ദേഹു മൊഹി
ഹരഹു കലേസ് ബികാര്
രണ്ടാം ദോഹ, മംഗളാചരണത്തിന് ഒപ്പം നമുക്ക് പ്രാര്ഥനയുടെ ഘടന എന്തെന്ന് കാട്ടിത്തരുന്നു. പ്രാര്ഥനയ്ക്ക് അഞ്ച് ഘടകങ്ങള് ഉണ്ട്. നമന്, സ്മരന്, കീര്ത്തന്, യാചന്, അര്പ്പണ്. പ്രാര്ഥിക്കുമ്പോള് ഈ അഞ്ചുഘടകങ്ങളും ഉണ്ടാവണം. അപ്പോഴേ പ്രാര്ഥന സാര്ഥകമാകൂ.
നമനം, നമിക്കുക എന്നതെല്ലാം വിനയത്തിന്റെ സൂചകങ്ങളാണ്. വിനയത്തിന്റെ പ്രകടനമോ, അല്ലെങ്കില് വിനയം പോഷിപ്പിക്കാനോ നമനം സഹായിക്കും. വിനയം എന്നത് ഏറെ പ്രത്യേകതകളുള്ള മൂല്യമാണ്. എപ്പോള് തനിക്ക് ആ ഗുണമുണ്ടെന്ന് ഒരാള്ക്ക് തോന്നുന്നുവോ അപ്പോള് അത് അയാളെ വിട്ടു പോയിട്ടുണ്ടാവും. വിനയമെന്നത് കാട്ടിക്കൂട്ടലുകളല്ല. അതൊരു മനോഭാവമാണ്.
ബ്രഹ്മചാരി സുധീര് ചൈതന്യ
ജന്മഭൂമി ഓണ്ലൈന്