മോഹന്ലാല്-ബി. ഉണ്ണികൃഷ്ണന് ചിത്രം ‘ആറാട്ടി’ലെ ലൊക്കേഷന് ചിത്രങ്ങള് പുറത്ത്. തിരുവനന്തപുരം ജില്ലയിലാണ് സിനിമയുടെ ചിത്രീകരണം പുരോഗമിക്കുന്നത്. മെറൂണ് നിറത്തിലുള്ള കുര്ത്തയും വെള്ള മുണ്ടുമണിഞ്ഞ താരത്തിന്റെ ലുക്കാണ് ഇപ്പോള് പുറത്തുവന്നിരിക്കുന്നത്. ആറാട്ടിന്റെ എഡിറ്റര് ഷമീര് മുഹമ്മദാണ് സിനിമയുടെ ലൊക്കേഷന് ചിത്രം പുറത്തുവിട്ടിരിക്കുന്നത്.
‘നെയ്യാറ്റിന്കര ഗോപന്റെ ആറാട്ട്’ എന്നാണ് സിനിമയുടെ മുഴുവന് പേര്. വില്ലന് എന്ന സിനിമയ്ക്ക് ശേഷം ബി ഉണ്ണികൃഷ്ണനും മോഹന്ലാലും ഒരുമിക്കുന്ന സിനിമയാണിത്. സ്വന്തം ദേശമായ നെയ്യാറ്റിന്കരയില് നിന്ന് പാലക്കാട്ടെ ഒരു ഗ്രാമത്തിലേക്ക് പ്രത്യേക ലക്ഷ്യത്തോടെ ഗോപന് എത്തുന്നതും പിന്നീട് നടക്കുന്ന സംഭവങ്ങളുമാണ് സിനിമയുടെ പ്രമേയം.
ശ്രദ്ധ ശ്രീനാഥ് ആണ് നായിക. നെടുമുടി വേണു, സായ്കുമാര്, വിജയരാഘവന്, സിദ്ദിഖ്, ജോണി ആന്റണി, ഇന്ദ്രന്സ്, ഷീല, സ്വാസിക, രചന നാരയണന്കുട്ടി, മാളവിക തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങള്.
