കൊച്ചി: സിനിമാ തിയേറ്ററുകളിലെ കഫേകളില്‍ പോപ്കോണ്‍ ഉള്‍പ്പെടെ ഭക്ഷണപാനീയങ്ങള്‍ക്ക് കൊളളവില ഈടാക്കി സാധാരണക്കാരെ പിഴിയുന്ന വന്‍ കൊള്ളയ്‌ക്കെതിരെ കൊച്ചിയിലെ പ്രമുഖ മള്‍ട്ടിപ്ലക്‌സുകളില്‍ എന്‍ഫോഴ്സ്മെന്റ് വിഭാഗത്തിന്റെ മിന്നല്‍ പരിശോധന. ഭക്ഷ്യ-സിവില്‍ സപ്ലൈസ് മന്ത്രിയുടെ നിര്‍ദ്ദേശത്തെ തുടര്‍ന്ന് ജില്ലാ സപ്ലൈ ഓഫീസ്, ലീഗല്‍ മെട്രോളജി, ഭക്ഷ്യസുരക്ഷാ വകുപ്പുകള്‍ സംയുക്തമായി നടത്തിയ പരിശോധനയില്‍ ഗുരുതര ക്രമക്കേടുകള്‍ കണ്ടെത്തി.
മൂന്ന് കഫേകള്‍ക്കെതിരെ കേസുകള്‍ രജിസ്റ്റര്‍ ചെയ്തു.ഇടപ്പള്ളി ലുലു മാള്‍, കാക്കനാട് മാജിക് ഫ്രെയിംസ് തുടങ്ങിയ മള്‍ട്ടിപ്ലക്‌സ് തിയേറ്ററുകളിലും മറ്റ് പ്രധാന തിയേറ്ററുകളിലുമായിരുന്നു പരിശോധന.രാവിലെ 11 മണിക്ക് തുടങ്ങിയ സംയുക്ത പരിശോധന വൈകിട്ട് നാലുമണി വരെ തുടര്‍ന്നു.
മള്‍ട്ടിപ്ലക്‌സുകളില്‍ പോപ്കോണ്‍, ശീതളപാനീയങ്ങള്‍ എന്നിവയ്‌ക്ക് പൊതുവിപണിയിലേതിനേക്കാള്‍ അഞ്ചിരട്ടി വരെയാണ് ഈടാക്കുന്നത്. സാധാരണ സിംഗിള്‍ സ്‌ക്രീന്‍ തിയേറ്ററുകളില്‍ ഇത് രണ്ടിരട്ടിയോളമുണ്ട്. വിലവിവരപ്പട്ടിക സാധാരണക്കാര്‍ക്ക് കാണത്തക്കവിധം പ്രദര്‍ശിപ്പിക്കാതിരിക്കുക, അളവില്‍ കുറവു വരുത്തി വില്‍ക്കുക തുടങ്ങിയ കുറ്റങ്ങള്‍ക്കാണ് മൂന്ന് കഫേകള്‍ക്കെതിരെ ലീഗല്‍ മെട്രോളജി വകുപ്പ് കേസ് എടുത്തത്.
മൊബൈലില്‍ ക്യു ആര്‍ കോഡ് സ്‌കാന്‍ ചെയ്താല്‍ മാത്രം വിലവിവരങ്ങള്‍ ഉപഭോക്താക്കള്‍ക്ക് കാണാന്‍ കഴിയുന്ന തരത്തിലാണ് പലയിടത്തും സംവിധാനം ഉളളത്. ഇത് സാധാരണക്കാരായ സിനിമാപ്രേമികളെ ബുദ്ധിമുട്ടിക്കുന്നുണ്ടെന്ന് ഉദ്യോഗസ്ഥര്‍ പറഞ്ഞു. കഫേകളിലെ അമിതവില നിയന്ത്രിച്ച് പൊതുവിപണിക്ക് അനുസൃതമായി മാറ്റം വരുത്താന്‍ തിയേറ്റര്‍ മാനേജര്‍മാര്‍ക്ക് പരിശോധന സംഘം കര്‍ശന നിര്‍ദ്ദേശം നല്‍കി.
ഏതായാലും നോട്ടീസിന് പിന്നാലെ മള്‍ട്ടിപ്ലക്‌സ് തിയേറ്റര്‍ മാനേജ്മെന്റുകള്‍ നിരക്കുകളില്‍ ഇളവ് പ്രഖ്യാപിച്ചു. തിങ്കള്‍ മുതല്‍ വ്യാഴം വരെയുള്ള ദിവസങ്ങളില്‍ പോപ്കോണ്‍ 99 രൂപ നിരക്കില്‍ ലഭ്യമാക്കുമെന്നും സിനിമാ ടിക്കറ്റുകള്‍ കുറഞ്ഞ നിരക്കില്‍ പ്രേക്ഷകര്‍ക്ക് ലഭ്യമാക്കുമെന്നും അറിയിച്ചു.
