ഇന്ദ്രജിത്ത് സുകുമാരന് നായകനാകുന്ന വടം വലിയെ പാശ്ചാത്തലമാക്കിയുള്ള ‘ആഹാ’യുടെ ഗാന വീഡിയോ തമിഴ് സൂപ്പര് താരങ്ങളായ കാര്ത്തിയും വിജയ് സേതുപതിയും പുറത്തിറക്കും. മലയാളത്തിന്റെ മോഹന്ലാലും, മമ്മൂട്ടിയും ഇതോടൊപ്പം ഗാനങ്ങളുടെ വീഡിയോ പുറത്തുവിടുന്നുണ്ട്.
ഇന്ദ്രജിത്തിന്റെ ജന്മദിനമായ ഡിസംബര് 17ന് രാവിലെ 10ന് ഇത് പുറത്തിറക്കാനാണ് തീരുമാനിച്ചിരിക്കുന്നത്. സാസാ പ്രൊഡക്ഷന്സിന്റെ ബാനറില് പ്രേം എബ്രഹാം നിര്മിച്ച് ബിബിന് പോള് സാമുവല് സംവിധാനം ചെയ്ത ‘ആഹാ’ ഇന്ദ്രജിത്തിന്റെ അഭിനയ ജീവിതത്തിലെ വഴിത്തിരിവാകുമെന്നാണ് വിലയിരുത്തപ്പെടുന്നത്.
കേരളത്തിന്റെ തനത് കായിക വിനോദമായ വടംവലിയെ ആധാരമാക്കി സംഗീതത്തിനും പ്രണയത്തിനും കുടുംബ ബന്ധങ്ങള്ക്കും ഏറെ പ്രാധന്യം നല്കിക്കൊണ്ട് നിര്മിച്ച ചിത്രമാണ് ആഹാ. ടോബിത് ചിറയത്താണ് ചത്രത്തിന്റെ തിരക്കഥ. സയനോര ഫിലിപ്പാണ് ആഹായുടെ സംഗീത സംവിധാനം.
ജുബിത് നമ്രടത്ത്, ടിറ്റോ പി. തങ്കച്ചന് എന്നിവരാണ് ചിത്രത്തിന്റെ ഗാനരചയിതാക്കള്. ശാന്തി ബാലചന്ദ്രനാണ് ഇന്ദ്രജിത്തിന്റെ നായിക. അമിത് ചക്കാലക്കല്, അശ്വിന് കുമാര്, മനോജ് കെ. ജയന് എന്നിവരാണ് മറ്റു പ്രധാന താരങ്ങള്.
