ഹൈദരാബാദ്: ഗ്രേറ്റർ ഹൈദരാബ് മുൻസിപ്പൽ കോര്‍പറേഷന്‍ തെരഞ്ഞെടുപ്പ് പ്രചാരണത്തിനായി കേന്ദ്ര ആഭ്യന്തരമന്ത്രി അമിത് ഷാ തെലങ്കാനയിലെത്തി. പരസ്യപ്രചാരണത്തിന്റെ അവസാനദിനമായ ഇന്ന് റോഡ് ഷോ അടക്കം വിപുലമായ പരിപാടികളില്‍ അമിത് ഷാ പങ്കെടുക്കും. ഹൈദരാബാദിലെ ബീഗംപേട്ട് വിമാനത്താവളത്തില്‍ ഊഷ്മള സ്വീകരണമാണ് ബിജെപി നേതാക്കള്‍ അമിത് ഷായ്‌ക്ക് നല്‍കിയത്. നിരവധി പ്രവർത്തകർ അമിത് ഷായെ വരവേൽക്കാൻ വിമാനത്താവളത്തിന് പുറത്ത് തടിച്ചുകൂടി.
പിന്നീട് ഹൈദരാബാദിലെ ഓള്‍ഡ് സിറ്റിയിലുള്ള ഭാഗ്യലക്ഷ്മി ക്ഷേത്രത്തിലെത്തി പ്രാര്‍ത്ഥിച്ചു. സെക്കന്തരാബാദിലെ റോഡ് ഷോയിലായിരിക്കും അദ്ദേഹം പങ്കെടുക്കുക. ബിജെപി ദേശീയ വക്താവ് സമ്പിത് പത്രയും യുപി മുഖ്യമന്ത്രി യോഗി ആദിത്യനാഥും ശനിയാഴ്ച ഹൈദരാബാദില്‍ പ്രചാരണത്തിനായി എത്തി.
ബിജെപി ദേശീയ അധ്യക്ഷന്‍ ജഗത് പ്രകാശ് നദ്ദ വെള്ളിയാഴ്ച റോഡ് ഷോ നടത്തിയിരുന്നു. പ്രമുഖരെ രംഗത്തിറക്കി വലിയ രീതിയിലുള്ള പ്രചാരണമാണ് കോര്‍പറേഷന്‍ തെരഞ്ഞെടുപ്പില്‍ ബിജെപി ഇക്കുറി നടത്തിയത്. ഡിസംബര്‍ ഒന്നിന് 150 വാര്‍ഡുകളിലേക്ക് വോട്ടെടുപ്പ് നടക്കും. നാലിന് ഫലപ്രഖ്യാപനം നടത്തും.
