ബേക്കല്‍: നടി ആക്രമിക്കപ്പെട്ട കേസില്‍ മാപ്പുസാക്ഷിയുടെ മൊഴിമാറ്റി പറയാന്‍ എംഎല്‍എ കെ.ബി. ഗണേഷ് കുമാറിന്റെ ഓഫീസ് സെക്രട്ടറി പ്രദീപ് കുമാര്‍ സമ്മര്‍ദ്ദം ചെലുത്തി. മാപ്പു സാക്ഷി മൊഴി മാറ്റാന്‍ പ്രദീപ് കുമാര്‍ ഭീഷണിപ്പെടുത്തിയതായി ബേക്കല്‍ പോലീസാണ് ഇക്കാര്യം അറിയിച്ചത്. ഹൊസ്ദുര്‍ഗ് ഫസ്റ്റ് ക്ലാസ് മജിസ്ട്രേറ്റ് കോടതിയില്‍ സമര്‍പ്പിച്ച റിപ്പോര്‍ട്ടിലാണ് ഇക്കാര്യം വ്യക്തമാക്കിയിരിക്കുന്നത്.
കേസിലെ പധാന പ്രോസിക്യൂഷന്‍ സാക്ഷിയും ബേക്കല്‍ സ്വദേശിയുമായി ബബിന്‍ ലാലിനെ അന്വേഷിച്ച് കഴിഞ്ഞ ജനുവരി 23ന് കെ.ബി. ഗണേഷ് കുമാര്‍ എംഎല്‍എയുടെ ഓഫീസ് സെക്രട്ടറി പ്രദീപ് കുമാര്‍ ബേക്കലിലെത്തിയിരുന്നു. തൃക്കണ്ണാടെ ബന്ധുവീട്ടിലെത്തിയ പ്രദീപ് ബിബിനെ നേരിട്ട് കാണാന്‍ പറ്റാത്തതിനെ തുടര്‍ന്ന് അമ്മാവന്‍ ജോലി ചെയ്യുന്ന കാഞ്ഞങ്ങാട്ടെ ജുവല്ലറിയിലെത്തി. ഇവിടെ നിന്നും അമ്മയെ വിളിച്ച് ബിബിന്റെ വക്കീല്‍ ഗുമസ്തനാണെന്ന് പരിചയപ്പെടുത്തുകയും ബിബിനോട് മൊഴിമാറ്റാന്‍ ആവശ്യപ്പെടുകയുമായിരുന്നു.
പിന്നീട് കത്തുകളിലൂടേയും സമ്മര്‍ദം തുടര്‍ന്നു. ഭീഷണി ശക്തമായതോടെ സെപ്തംബര്‍ 26ന് ബിബിന്‍ ബേക്കല്‍ പോലീസിന് പരാതിയും നല്‍കി. തുടര്‍ന്ന് നടത്തിയ അന്വേഷണത്തില്‍ ജുവല്ലറിയിലെ സിസിടിവി ദൃശ്യങ്ങളും ലോഡ്ജില്‍ നല്‍കിയ തിരിച്ചറിയില്‍ രേഖകളും പരിശോധിച്ചപ്പോഴാണ് ഭീഷണിയുമായി എത്തിയത് പ്രദീപാണെന്ന് തിരിച്ചറിഞ്ഞത്. ഇതിന്റെ അടിസ്ഥാനത്തിലാണ് കോടതിയില്‍ പ്രദീപിനെതിരെ റിപ്പോര്‍ട്ട് നല്‍കിയിട്ടുള്ളത്.
എന്നാല്‍ കത്ത് എഴുതിയത് സംബന്ധിച്ച് കൂടുതല്‍ വ്യക്തത വരുത്തേണ്ടതുണ്ട്. സംഭവത്തിനു പിന്നില്‍ മറ്റ് ആരുടേയെങ്കിലും പങ്കാളിത്തം ഉണ്ടോയെന്നത് സംബന്ധിച്ചും വിശദമായ അന്വേഷണം നടത്തേണ്ടതുണ്ടെന്നും പോലീസ് അറിയിച്ചു.
അതേസമയം ബിബിനെ വിളിക്കുന്നതിനായി പുതിയ മൊബൈല്‍ സിംകാര്‍ഡ് എടുത്തതായി കണ്ടെത്തി. തമിഴ്നാട്ടില്‍ നിന്നാണ് പുതിയ സിം എടുത്തിട്ടുള്ളത്. ഇതില്‍ നിന്നും ബിബിസനെ വിളിച്ച ശേഷം രണ്ട് പ്രധാന വ്യക്തികളെ കൂടി വിളിച്ചതായും അന്വേഷണ സംഘം കണ്ടെത്തിയിട്ടുണ്ട്.
