കൊച്ചി: താര സംഘടനയായ അമ്മയില്‍ നിന്ന് രാജി പ്രഖ്യാപിച്ച ശ്വേത മേനോന്‍ ഉള്‍പ്പെടെ ഭരണസമിതി അംഗങ്ങള്‍ ഇതുവരെ രാജിക്കത്ത് നല്‍കിയിട്ടില്ലെന്ന് അഡ്‌ഹോക്ക് കമ്മിറ്റി അധ്യക്ഷന്‍ രമേഷ് പിഷാരടി എം എല്‍ എ. അമ്മ അഡ്‌ഹോക്ക് കമ്മിറ്റി യോഗത്തിനിടെയാണ് രമേഷ് പിഷാരടി പ്രതികരിച്ചത്. രാജി വച്ചവര്‍ അതേക്കുറിച്ച് വിശദീകരിക്കണം.
കമ്മിറ്റി അംഗമായ മുന്‍ മന്ത്രി കെ ബി ഗണേഷ് കുമാറും രമേഷ് പിഷാരടിക്കൊപ്പമുണ്ടായിരുന്നു.പൊതുസമൂഹത്തെ ഉള്‍പ്പെടെ ശ്വേതയും കൂട്ടരും കബളിപ്പിച്ചെന്ന് ഗണേഷ് കുമാര്‍ പ്രതികരിച്ചു.
മാധ്യമങ്ങളിലൂടെ ജനങ്ങളുടെ മുന്നില്‍ പ്രഖ്യാപിച്ച രാജി കൊടുക്കേണ്ടത് ശ്വേതയുടെ ചുമതലയാണ്. തങ്ങളുടെ ചുമതലയല്ല. അവര്‍ കോടതിയില്‍ പോയാല്‍ അപ്പോള്‍ കാണാമെന്നും അമ്മ ജനറല്‍ ബോഡിയുടേതാണ് അന്തിമ തീരുമാനമെന്നും ഗണേഷ് കുമാര്‍ പ്രഞ്ഞു.
ജൂണ്‍ 21 ന് കൊച്ചിയില്‍ നടന്ന അമ്മ ജനറല്‍ ബോഡി യോഗത്തിന് പിന്നാലെയാണ് പ്രസിഡന്റ് ശ്വേത മേനോന്‍ അടക്കം മുഴുവന്‍ ഭരണ സമിതി അംഗങ്ങളും രാജി വച്ചത്.പിന്നാലെയാണ് സംഘടനയെ നയിക്കാന്‍ അടിയന്തരമായി അഡ്‌ഹോക്ക് കമ്മിറ്റി രൂപീകരിച്ചത്. രമേഷ് പിഷാരടി അധ്യക്ഷനായ കമ്മിറ്റിയില്‍ കെ ബി ഗണേഷ് കുമാര്‍, സാദ്ദിഖ്, കലാഭവന്‍ ഷാജോണ്‍, സുരേഷ് കൃഷ്ണ, ഡോ. റോണി ഡേവിഡ്, ആശ അരവിന്ദ്, കൃഷ്ണപ്രഭ, ദേവി ചന്ദന എന്നിവരാണ് അംഗങ്ങള്‍.
