പാരീസ്: ലോക ചാമ്പ്യന്മാരായ ഫ്രാന്‍സിന്റെ വിജയക്കുതിപ്പിന് വിരാമം. രാജ്യാന്തര സൗഹൃദ ഫുട്‌ബോള്‍ മത്സരത്തില്‍ ഫിന്‍ലന്‍ഡ് ഏകപക്ഷീയമായ രണ്ട് ഗോളുകള്‍ക്ക് ഫ്രാന്‍സിനെ കീഴടക്കി. തുടര്‍ച്ചയായ പന്ത്രണ്ട് മത്സരങ്ങളില്‍ തോല്‍വിയറിയാതെ മുന്നേറിയ ഫ്രാന്‍സിന്റെ ആദ്യ തോല്‍വിയാണിത്. അതേസമയം ഫ്രാന്‍സിനെതിരെ ഫിന്‍ലന്‍ഡിന്റെ ആദ്യ വിജയവും. നേരത്തെ എട്ടുതവണ ഏറ്റുമുട്ടിയപ്പോഴും ഫിന്‍ലന്‍ഡ് ഫ്രാന്‍സിനോട് തോറ്റു.
ആദ്യ പകുതിയില്‍ മാര്‍കസ് ഫോര്‍സും ഓനി വലാകാരിയുമാണ് ഫിന്‍ലന്‍ഡിനായി ഗോളുകള്‍ നേടിയത്. ലോക ചാമ്പ്യന്മാരായ ഫ്രാന്‍സാണ് കളിയുടെ തുടക്കത്തില്‍ ആധിപത്യം സ്ഥാപിച്ചത്. തുടക്കത്തില്‍ തന്നെ ഗോള്‍ നേടാന്‍ അവസരവും ലഭിച്ചു. എന്നാല്‍ മാര്‍ക്കസ് തുറാമിന്റെ ഹെഡര്‍ ക്രോസ്ബാറില്‍ തട്ടി തെറിച്ചു. പിന്നീട് ഫിന്‍ലന്‍ഡ് കളിയുടെ നിയന്ത്രണം ഏറ്റെടുത്തു.
2019 ജൂണില്‍ നടന്ന യൂറോ 2020 യോഗ്യതാ മത്സരത്തില്‍ തുര്‍ക്കിയോടാണ് ഫ്രാന്സ് അവസാനമായി തോറ്റത്. നേഷന്‍സ് ലീഗിലെ ഗ്രൂപ്പ് മൂന്ന് മത്സരത്തില്‍ ഫ്രാന്സ് ശനിയാഴ്ച പോര്‍ച്ചുഗലിനെ നേരിടും.
