ഇന്ത്യ-ഫ്രാൻസ് ബന്ധം പുതിയ ഉയരങ്ങളിലെത്തി : പാരീസിലെ സ്വാമിനാരായണ ക്ഷേത്രത്തിന്റെ ഉദ്ഘാടന വേളയിൽ പ്രധാനമന്ത്രി മോദി

ന്യൂദൽഹി: ഇന്ത്യയും ഫ്രാൻസും തമ്മിലുള്ള ബന്ധം പുതിയ ഉയരങ്ങളിലെത്തിയതായി പ്രധാനമന്ത്രി നരേന്ദ്ര മോദി. നമ്മുടെ കാലങ്ങളായി നിലനിൽക്കുന്ന സാംസ്കാരിക, രാഷ്‌ട്രീയ ബന്ധങ്ങളുടെ ശക്തമായ അടിത്തറയിൽ അധിഷ്ഠിതമായതിനാൽ ഈ തന്ത്രപരമായ പങ്കാളിത്തവും സവിശേഷമാണെന്ന് അദ്ദേഹം പറഞ്ഞു. പാരീസിലെ സ്വാമിനാരായണ ക്ഷേത്രത്തിന്റെ ഉദ്ഘാടന ചടങ്ങിനെ വീഡിയോ കോൺഫറൻസിലൂടെ അഭിസംബോധന ചെയ്തുകൊണ്ട് സംസാരിക്കുകയായിരുന്നു അദ്ദേഹം.

പാരീസിലെ ഈ മനോഹരമായ ക്ഷേത്രം നൂറ്റാണ്ടുകളായി ഇരു രാജ്യങ്ങളും തമ്മിലുള്ള സഹകരണത്തിന്റെയും അവസരങ്ങളുടെയും പ്രതീകമായി നിലകൊള്ളുമെന്ന് അദ്ദേഹം പ്രത്യാശ പ്രകടിപ്പിച്ചു. ” സമീപ വർഷങ്ങളിൽ ഇന്ത്യയും ഫ്രാൻസും തമ്മിലുള്ള ബന്ധം പുതിയ ഉയരങ്ങളിലെത്തിയിട്ടുണ്ട്. എന്റെ സുഹൃത്ത് പ്രസിഡന്റ് (ഇമ്മാനുവൽ) മാക്രോണിനൊപ്പം, ഇരു രാജ്യങ്ങളും ഒരു പ്രത്യേക ആഗോള തന്ത്രപരമായ പങ്കാളിത്തം മുന്നോട്ട് കൊണ്ടുപോകുന്നു,” – അദ്ദേഹം പറഞ്ഞു.

ഇന്ത്യയും ഫ്രാൻസും പുതിയ ഊർജ്ജത്തോടെ ഒരുമിച്ച് മുന്നേറുന്നു

സാങ്കേതികവിദ്യ, കൃത്രിമബുദ്ധി (AI), പ്രതിരോധം, ബഹിരാകാശം, കാലാവസ്ഥാ പ്രവർത്തനം തുടങ്ങിയ മേഖലകളിൽ ഇന്ത്യയും ഫ്രാൻസും പുതിയ ഗതിവേഗത്തിലും ഊർജ്ജസ്വലതയിലും ഒരുമിച്ച് മുന്നേറുകയാണെന്ന് പ്രധാനമന്ത്രി പറഞ്ഞു. “2026 ഇന്ത്യ-ഫ്രാൻസ് നവീകരണ വർഷമായും നമ്മൾ ആഘോഷിക്കുകയാണ്. നമ്മുടെ ദീർഘകാല സാംസ്കാരിക, രാഷ്‌ട്രീയ ബന്ധങ്ങളുടെ ശക്തമായ അടിത്തറയെ അടിസ്ഥാനമാക്കിയുള്ളതാണ് ഈ തന്ത്രപരമായ പങ്കാളിത്തം,”- അദ്ദേഹം പറഞ്ഞു.

ഇന്ത്യൻ സൈനികരുടെ ത്യാഗങ്ങളുടെ ഓർമ്മകൾ ഇപ്പോഴും സജീവമാണ്

ഫ്രാൻസിൽ ഇന്ത്യൻ സൈനികർ നടത്തിയ ത്യാഗങ്ങളുടെ ഓർമ്മകൾ ജനങ്ങളുടെ ഹൃദയങ്ങളിൽ ഇപ്പോഴും നിലനിൽക്കുന്നു എന്നതിന് ചരിത്രം സാക്ഷ്യം വഹിക്കുന്നുണ്ടെന്ന് പ്രധാനമന്ത്രി പറഞ്ഞു. “സംസ്കൃതം ജനപ്രിയമാക്കുന്നതിൽ ഫ്രഞ്ച് പണ്ഡിതന്മാർ പ്രധാന പങ്ക് വഹിച്ചിട്ടുണ്ടെന്ന് ഭാഷാപ്രേമികൾക്കും അറിയാം. രാമകൃഷ്ണ പരമഹംസനെയും സ്വാമി വിവേകാനന്ദനെയും കുറിച്ചുള്ള റൊമെയ്ൻ റോളണ്ടിന്റെ കൃതികൾ നമ്മുടെ സമൂഹങ്ങളെ കൂടുതൽ അടുപ്പിച്ചു,” – അദ്ദേഹം കൂട്ടിച്ചേർത്തു.

ഇരു രാജ്യങ്ങളും തമ്മിലുള്ള ആത്മീയ ബന്ധത്തിൽ ഒരു പുതിയ അധ്യായം

പാരീസിൽ നിന്ന് പുതുച്ചേരിയിലെ ശ്രീ അരബിന്ദോ ആശ്രമത്തിലേക്കുള്ള ‘ദി മദറിന്റെ’ ആത്മീയ യാത്ര ഇന്ത്യയിലും ഫ്രാൻസിലുമുള്ള എണ്ണമറ്റ അന്വേഷകർക്ക് പ്രചോദനമായിട്ടുണ്ടെന്ന് മോദി പറഞ്ഞു. ശ്രീല പ്രഭുപാദ സ്വാമി പതിറ്റാണ്ടുകൾക്ക് മുമ്പ് ഫ്രാൻസ് സന്ദർശിച്ചിരുന്നുവെന്നും ഇസ്കോൺ വഴി ഇരു രാജ്യങ്ങളും തമ്മിലുള്ള ആത്മീയ ബന്ധത്തിൽ ഒരു പുതിയ അധ്യായം തുറന്നിട്ടുണ്ടെന്നും അദ്ദേഹം പറഞ്ഞു.

“ഇന്ന്, യോഗ ഇരു രാജ്യങ്ങളിലെയും ജനങ്ങളെ ബന്ധിപ്പിക്കുന്ന ഒരു മാധ്യമമായി മാറിയിരിക്കുന്നു. അന്താരാഷ്‌ട്ര യോഗ ദിനത്തിലെ ഈഫൽ ടവറിന്റെ ചിത്രങ്ങൾ ഫ്രാൻസിൽ യോഗയുടെ വലിയ ജനപ്രീതിയെ പ്രതിഫലിപ്പിക്കുന്നു”- പ്രധാനമന്ത്രി കൂട്ടിച്ചേർത്തു.