ദുബായ്: ദുബായ് ഡ്യൂട്ടി ഫ്രീ മില്യനിയം മില്യനയര് നറുക്കെടുപ്പില് മലയാളിക്ക് ഏഴ് കോടി രൂപ (10 ലക്ഷം ഡോളർ) സമ്മാനം. 21 വര്ഷമായി ദുബായില് ജോലി ചെയ്യുന്ന അനൂപ് പിള്ളയാണ് (46) ബുധനാഴ്ച നടന്ന 341 സീരീസ് നറുക്കെടുപ്പിലൂടെ കോടീശ്വരനായത്. 4512 ആണ് വിജയനമ്പര്.
കോണ്ട്രാക്ടിങ് കമ്പനിയിലെ എം.ഇ.പി സീനിയര് മാനേജറാണ് അനൂപ് പിള്ള. കഴിഞ്ഞ പത്ത് വര്ഷമായി നറുക്കെടുപ്പില് പങ്കെടുക്കാറുണ്ട്. മഹാമാരിക്കാലത്ത് ഇത്തരമൊരു സമ്മാനം തേടിയെത്തിയതില് ഏറെ സന്തോഷമുണ്ടെന്ന് അനൂപ് പറഞ്ഞു.
നറുക്കെടുപ്പ് വിജയത്തിൽ സന്തോഷമുണ്ടെന്നും 5000 ടിക്കറ്റുകൾ വിറ്റഴിയുന്തോറും നടക്കുന്ന ദുബായ് ഡ്യൂട്ടി ഫ്രീ നറുക്കെടുപ്പ് തന്നെപ്പോലുള്ളവർക്ക് വിജയം നേടാൻ അപൂർവ അവസരമൊരുക്കുന്നതായും അനൂപ് പറഞ്ഞു. ഭാര്യക്കും രണ്ട് മക്കളോടുമൊത്ത് ദുബായിലാണ് അനൂപ് താമസിക്കുന്നത്.
ദുബായ് ഡ്യൂട്ടിഫ്രീ, അബുദാബി ബിഗ് ടിക്കറ്റ് നറുക്കെടുപ്പുകളിൽ പതിവായി മലയാളികളടക്കമുള്ള ഇന്ത്യക്കാരാണ് ജേതാക്കളാകാറ്. എന്നാൽ, അടുത്തിടെ നടന്ന നറുക്കെടുപ്പുകളിൽ മറ്റു രാജ്യക്കാരായിരുന്നു വിജയികൾ. ഇടവേളയ്ക്ക് ശേഷമാണ് വീണ്ടും ഒരു മലയാളിയെ തേടി മഹാഭാഗ്യമെത്തുന്നത്. ദുബായ് ഡ്യൂട്ടി ഫ്രീ ആരംഭിച്ച 1999ന് ശേഷം വിജയിയാകുന്ന 169ാമത്തെ ഇന്ത്യക്കാരനാണ് അനൂപ്.
ഇതോടനുബന്ധിച്ച് നടന്ന മറ്റു നറുക്കെടുപ്പുകളിൽ ഫിലിപ്പീൻസുകാരിക്ക് ആഡംബര കാറും ഇന്ത്യക്കാരനായ വിശാൽ രവീന്ദ്രന്, ഫിലിപ്പീൻസ് യുവതി എന്നിവർക്ക് ആഡംബര മോട്ടോർ ബൈക്കുകളും സമ്മാനം ലഭിച്ചു.
