കുവൈത്ത്: കളഞ്ഞുകിട്ടിയ പണവും രേഖയും അടങ്ങിയ പേഴ്സ് തിരികെ നല്കി മാതൃകയായി മലയാളി ടാക്സി ഡ്രൈവര്. തിരുവനന്തപുരം ആനാട് സ്വദേശിയായ സുജിത് ആണ് മലയാളികൾക്ക് അഭിമാനമായത്.
സാല്മിയ ഈസാ അല് ഖത്താമി റോഡില് നിന്നുമാണ് പേഴ്സ് ലഭിക്കുന്നത്. ഉട൯ യാത്രാ കുവൈത്ത് ടാക്സിഗ്രൂപ്പില് വിവരം അറിയിച്ചു സംഘടനാ ഭാരവാഹികള് വിവിധ മണി എക്സേഞ്ചുകളില് സിവില് ഐ ഡി നമ്പര് നല്കി ഉടമയായ മുഹമ്മദ് റിയാസിന്റെ ഫോണ് നമ്പര് കരസ്ഥമാക്കി വിവരം അറിയിക്കുകയായിരുന്നു.
സുജിത്തും സഹപ്രവര്ത്തകരും ചേര്ന്ന് മുഹമ്മദ് റിയാസിന്റെ താമസസ്ഥലത്ത് പോയി 80 കുവൈറ്റ് ദിനാറും രേഖകളും അടങ്ങിയ പേഴ്സ് തിരികെ നല്കി.സുജിത് കുവൈത്തിലെത്തിയിട്ട് 11 മാസമാകുന്നു. കഴിഞ്ഞ 9 മാസമായി തൊഴിലില്ലാത്ത അവസ്ഥയില് ആയിരുന്നു. ഇപ്പോള് രണ്ട് മാസമായി ടാക്സി ഓടിയ്ക്കുന്നു, നിത്യവൃത്തി കഴിഞ്ഞുപോകാ൯പോലും ബുദ്ധിമുട്ടുന്ന ഈ സാഹചര്യത്തിലും വീണുകിട്ടിയ പണം തിരികെ നല്കി ടാക്സി ഡ്രൈവര്മാര്ക്കും സമൂഹത്തിനും മാതൃകയായി.
