വാഷിങ്ടണ്: ഇസ്രായേല്-യുഎഇ സഹകരണ കരാറിന് വഴിയൊരുക്കിയതിന് സമാധാനത്തിനുള്ള നോബല് സമ്മാനത്തിന് യുഎസ് പ്രസിഡന്റ് ഡൊണാള്ഡ് ട്രംപിനെ ശുപാര്ശ ചെയ്ത് നോര്വേ. നോര്വീജിയന് പാര്ലമെന്റ് അംഗവും നാറ്റോ പാര്ലമെന്ററി അസംബ്ലി ചെയര്മാനുമായ ക്രിസ്റ്റ്യന് ടൈബ്രിംഗ്-ജെജെഡെ ആണ് ട്രാംപിനെ നാമനിര്ദ്ദേശം സമര്പ്പിച്ചത്.
ലോകമെമ്പാടുമുള്ള രാജ്യങ്ങള് തമ്മിലുള്ള സംഘര്ഷങ്ങള് അവസാനിപ്പിക്കാനുള്ള ട്രംപിന്റെ ശ്രമങ്ങളെ ടൈബ്രിംഗ്-ജെജെഡെ പ്രശംസിച്ചു. കിം ജോങ് ഉന്നിനെ ആതിഥേയത്വം വഹിച്ച സിംഗപ്പൂര് ഉച്ചകോടിക്ക് ട്രംപിന് 2018 ല് സമാധാനത്തിനുള്ള നൊബേല് സമ്മാനം ലഭിക്കുന്നതിനുള്ള നാമനിര്ദ്ദേശവും ട്രൈബിംഗ് സമര്പ്പിച്ചിരുന്നു. നാലു തവണ പാര്ലമെന്റ് അംഗമായ ടൈബ്രിംഗ്-ജെജെഡെ സമാധാനത്തിനുള്ള നോബല് സമ്മാന സമിതിക്ക് നല്കിയ നാമനിര്ദ്ദേശത്തില് സംഘര്ഷത്തില് ഏര്പ്പെടുന്ന രാജ്യങ്ങള് തമ്മില് സമ്പര്ക്കവും ചര്ച്ചയും സ്ഥാപിക്കുന്നതില് ട്രംപിന്റെ ഭരണകൂടം പ്രധാന പങ്ക് വഹിച്ചിട്ടുണ്ടെന്ന് വ്യക്തമാക്കുന്നു. അടുത്ത കാലത്തായി സമാധാന സമ്മാനം ലഭിച്ച ആളുകള് ഡൊണാള്ഡ് ട്രംപിനേക്കാള് വളരെ കുറവാണ് ചെയ്തതെന്ന് അദ്ദേഹം കൂട്ടിച്ചേര്ത്തു.
ഇസ്രായേലുമായുള്ള നയതന്ത്ര, വാണിജ്യ സഹകരണം വിപുലീകരിക്കുന്നതിനായി യുഎഇ കരാര് ഉണ്ടാക്കിയത് അന്താരാഷ്ട്ര തലത്തില് വലിയ ചലനങ്ങളുണ്ടാക്കുന്നതായിരുന്നു. യുഎസ് പ്രസിഡന്റ് ട്രംപിന്റെ മധ്യസ്ഥതയിലാണ് ഇരുരാജ്യങ്ങളും തമ്മില് കരാര് ഉണ്ടാക്കിയത്. ഇതിന്റെ ഭാഗമായാണ് നിലവിലുണ്ടായിരുന്ന ഇസ്രയേല് ബഹിഷ്കരണ നിയമം റദ്ദാക്കിയത്.
പാലസ്തീനെ പൂര്ണമായും കൈയൊഴിഞ്ഞാണ് യുഎഇ ഇസ്രായേലുമായി സഹകരണത്തിലായത്.. പാലസ്തീനു വേണ്ടി 1972ല് തയാറാക്കിയ ഇസ്രയേല് ബഹിഷ്കരണ നിയമം യുഎഇ റദ്ദാക്കി. ഫെഡറല് നിയമം നമ്പര് 15 പിരിച്ചുവിട്ട് 2020ലെ ഫെഡറല് നിയമം യുഎഇ പ്രസിഡന്റ് ഷെയ്ഖ് ഖലീഫ ബിന് സായിദ് അല് നഹ്യാന് പുറത്തിറക്കിരുന്നു.പുതിയ ഉത്തരവിന്റെ അടിസ്ഥാനത്തില് യുഎഇയിലെ വ്യക്തികള്ക്കും കമ്പനികള്ക്കും ഇസ്രായേലില് താമസിക്കുന്ന വ്യക്തികളുമായോ മറ്റ് രാജ്യങ്ങളിലുള്ള ഇസ്രായേല് പൗരന്മാരുമായോ ഇസ്രയേല് സ്ഥാപനങ്ങളുമായോ സാമ്പത്തിക, വാണിജ്യ മേഖലകളിലും മറ്റ് ഇടപാടുകളിലും ഏര്പ്പെടുന്നതിനും കരാറുകള് ഉണ്ടാക്കുന്നതിനും സാധിക്കും. എല്ലാത്തരം ഇസ്രായേലി ചരക്കുകളും ഉല്പ്പന്നങ്ങളും യുഎഇയില് പ്രവേശിപ്പിക്കാനും കൈമാറ്റം ചെയ്യാനും കൈവശം വയ്ക്കാനും വ്യാപാരം നടത്താനും ഇനി അനുവദിക്കും
