തൊടുപുഴ: മുക്കുപണ്ടം പണയം വച്ച് പണം തട്ടിയെടുക്കാന്‍ ശ്രമിച്ച കേസില്‍ യുവാവ് അറസ്റ്റില്‍. പുതുപ്പരിയാരം കുന്നത്തുപിള്ളില്‍ രാഹുല്‍(35) ആണ് പിടിയിലായത്. ഇന്നലെ ഉച്ചയ്‌ക്ക് ഒന്നോടെ മണക്കാട് റോഡിലുള്ള സ്വകാര്യ പണമിടപാട് സ്ഥാപനത്തിലാണ് സംഭവം.
കാറിലെത്തിയ യുവാവ് ഒരു പവന്റെ മാലയാണെന്ന് തെറ്റിധരിപ്പിച്ച് 18,000 രൂപ തട്ടിയെടുക്കാനായിരുന്നു ശ്രമം. സംശയം തോന്നിയ ഉടമ മാല കൂടുതല്‍ പരിശോധന നടത്തിയപ്പോഴാണ് മുക്കുപണ്ടമാണെന്നു വ്യക്തമായത്. വിവരം അറിയിച്ചതിനെ തുടര്‍ന്ന് പോലീസെത്തി ഇയാളെ കസ്റ്റഡിയിലെടുക്കുകയായിരുന്നു.
ഇയാള്‍ സമാനരീതിയില്‍ മറ്റു തട്ടിപ്പുകള്‍ നടത്തിയിട്ടുണ്ടോയെന്നും അന്വേഷിച്ചുവരികയാണ്. അടുത്തിടെ തൊടുപുഴയില്‍ മുക്കുപണ്ടം പണയംവെച്ച് തട്ടിപ്പ് നടത്തിയ കേസില്‍ മറ്റൊരാളും പിടിയിലായിരുന്നു. രണ്ട് മാസം മുമ്പാണ് സംഭവം.
