കട്ടപ്പന: ശക്തമായ മഴയിലും കാറ്റിലും തോപ്രാംകുടി കനകക്കുന്ന് മേഖലയില് വ്യാപക നാശം. കനകക്കുന്ന് മാക്കല് സിജോയുടെ വീട് ഭാഗികമായി നശിച്ചു. തലനാരിഴക്കാണ് ഈ കുടുംബം രക്ഷപെട്ടത്. ഇന്നലെ പുലര്ച്ചയോടെയാണ് സിജോയുടെ വീടിനു മുകളിലേക്ക് മരം കടപുഴകി വീണത്. സിജോയും കുടുംബവും ഈ സമയം ഉറക്കത്തിലായിരുന്നു.
വീടിന്റെ ആസ്പറ്റോസ് ഷീറ്റുകള് പൊട്ടി ഇവരുടെ ദേഹത്ത് വീഴുകയും അത്ഭുതകരമായി ഇവര് രക്ഷപെടുകയുമായിരുന്നു. ഒറ്റമുറി വീട്ടിലാണ് സിജോയും കുടുംബവും അന്തിയുറങ്ങിയിരുന്നത്. വീട് തകര്ന്നതോടെ ഇനി എന്തുചെയ്യുമെന്നറിയാത്ത അവസ്ഥയിലാണ് ഈ കുടുംബം. വീടിന്റെ ഷീറ്റുകളും ഒരു ഭിത്തിയും
പൂര്ണമായി തകര്ന്ന അവസ്ഥയിലാണ്. വില്ലേജ് അധികൃതര് അടക്കമുള്ളവര് സ്ഥലം സന്ദര്ശിച്ചു. തോപ്രാംകുടി മേഖലയില് കഴിഞ്ഞ ദിവസം വൈകിട്ട് മുതല് ശക്തമായ മഴയും കാറ്റുമാണ് അനുഭവപ്പെടുന്നത്. കാറ്റില് മരങ്ങള് ഒടിഞ്ഞു വീഴുകയും കടപുഴകി വീഴുകയും ചെയ്തതോടെ കനത്ത നാശമാണ് മേഖലയില് ഉണ്ടായിട്ടുള്ളത്.
