കൊച്ചി: സംസ്ഥാനത്ത് കൊറോണ വ്യാപകമാകുന്നതിനിടയിലും സാമൂഹിക അകലവും ലോക്ഡൗണ്‍ നിയന്ത്രണങ്ങളും കാറ്റില്‍ പറത്തി കോണ്‍ഗ്രസ് എംഎല്‍എയുടെ ധിക്കാരം. കാലടി ബ്ലോക്ക് ഡിവിഷനില്‍ പെട്ട 5 മുതല്‍ 12 വരെ വാര്‍ഡുകളിലെ കുട്ടികള്‍ക്ക് മാസ്‌ക് വിതരണം നടത്തുന്ന ചടങ്ങിലാണ് എംഎല്എ സാമൂഹ്യ അകലം പാലിക്കാതെ നിയന്ത്രണങ്ങള്‍ ലംഘിച്ചത്.
ജനപ്രതിനിധികളും പ്രാദേശിക കോണ്‍ഗ്രസ് നേതാക്കളും നേതൃത്വം നല്‍കിയ മാസ്‌ക് വിതരണ ചടങ്ങിലാണ് കൊറോണ പ്രോട്ടോക്കോള്‍ ലംഘനം നടന്നത്. നിയന്ത്രണങ്ങളെല്ലാം കാറ്റില്‍പ്പറത്തി രാഷ്‌ട്രീയപ്രവര്‍ത്തകര്‍ കുട്ടികളോടൊപ്പം നിന്ന് ഫോട്ടോയും എടുത്തു.
അറുപതോളം കുട്ടികളാണ് ചടങ്ങില്‍ പങ്കെടുത്തത്. ഇവരോടൊപ്പം കൈക്കുഞ്ഞുങ്ങളുമായി അമ്മമാരും ഉണ്ടായിരുന്നു. കേരളത്തിലെ കൊറോണ കേസുകള്‍ ദിനംപ്രതി വര്‍ധിക്കുന്നതിന് ഇടയിലാണ് കുട്ടികളെ ചേര്‍ത്തു നിര്‍ത്തി സാമൂഹിക അകലം എന്നത് കേട്ടുകേള്‍വി പോലുമില്ലാത്ത പോലെ എംഎല്‍എയും സംഘവും പെരുമാറിയത്.
