പൊയിനാച്ചി: കാസര്കോട് കരിച്ചേരി വളവില് കഴിഞ്ഞ ദിവസമുണ്ടായ അപകടം അധികാരികള് വിളിച്ചുവരുത്തിയതെന്ന് യുവമോര്ച്ച ഉദുമ മണ്ഡലം പ്രസിഡന്റ് മഹേഷ് ഗോപാല് ആരോപിച്ചു. കരിച്ചേരി വളവിലെ റോഡിന്റെ അപാകത ചുണ്ടികാട്ടി പണി തടസപ്പെടുത്തികൊണ്ടുള്ള സമരത്തിലേക്ക് പോയ ഏക സംഘടന യുവമോര്ച്ചയാണ്.
നിര്മാണജോലി പുരോഗമിക്കുന്ന സമയത്ത് യുവമോര്ച്ച നടത്തിയ സമരത്തില് അശാസ്ത്രീയ നിര്മ്മാണവും, ഭാവിയില് ഉണ്ടാകുന്ന അപകടങ്ങളെ കുറിച്ചും പ്രധാനമായും ചൂണ്ടികാട്ടിയതാണ്. അന്ന് ചില രാഷ്ട്രീയക്കാരുടെയും, കരാറുകാരുടെയും കളിപ്പാവയായി മാറിയ ഉദ്യോഗസ്ഥരാണ് ഈ അപകടത്തിനും, ഒരു മരണത്തിനും ഉത്തരവാദിയെന്നും അവര്ക്കെതിരെ കേസെടുക്കണമെന്നും മഹേഷ് ഗോപാല് ആവശ്യപ്പെട്ടു.
പല മേഖലകളിലും അപകടകരമായ രീതിയിലാണ് നിര്മാണം നടത്തിയിരിക്കുന്നത്, മഴക്കാലമാകുന്നതോടെ ഇതിലും വലിയ അപകടമായിരിക്കും കാത്തിരിക്കുന്നതെന്നും അടിയന്തിരമായി വേണ്ടപ്പെട്ടവര് ഇടപെട്ടില്ലെങ്കില് ലോക്ക് ഡൗണ് കഴിയുന്ന മുറക്ക് റോഡ് നിര്മ്മാണം പൂര്ണമായും തടസപ്പെടുത്തികൊണ്ടുള്ള സമരത്തിലേക്ക് പോകുമെന്നും മഹേഷ് ഗോപാല് വ്യക്തമാക്കി.
