തൊടുപുഴ: താന്‍ നിരീക്ഷണത്തിലാണെന്ന് മന്ത്രി എം.എം. മണി പറഞ്ഞത് അടിസ്ഥാനരഹിതമായ കാര്യമാണെന്നും ക്വാറന്റീനില്‍ ഇരിക്കേണ്ട സാഹചര്യം ഇല്ലെന്നും ഇ.എസ്. ബിജിമോള്‍ എംഎല്എ. ഫെയ്‌സ്ബുക്ക് ലൈവിലൂടെയാണ് ബിജിമോള്‍ ഈ കാര്യം അറിയിച്ചത്.
ജനങ്ങള്‍ക്കിടയില്‍ ആശങ്കയുണ്ടാക്കുന്ന വാര്‍ത്തകള്‍ വരുന്നത് നിര്‍ഭാഗ്യകരമാണ്. ജനങ്ങള്‍ ഭയപ്പെടേണ്ടതില്ല. ഡോക്ടറുമായോ ആശാ വര്‍ക്കറുമായോ ബന്ധപ്പെട്ടിട്ടില്ല. രോഗികളുമായി നേരിട്ടു സമ്പര്‍ക്കം ഉണ്ടായിട്ടില്ല. ക്വാറന്റീനില്‍ പോകേണ്ട സാഹചര്യം ഉണ്ടായാല്‍ മാധ്യമങ്ങളെ അറിയിക്കും. ചാനലുകളില്‍ ഇതു സംബന്ധിച്ച് പ്രചരിക്കുന്ന കാര്യങ്ങളില്‍ അടിസ്ഥാനമില്ല. ദയവായി ആരും അതിന്റെ പേരില്‍ ഉത്കണ്ഠപ്പെടേണ്ടതില്ല. ആയിരക്കണക്കിനു കോളുകളാണ് മൊബൈലില്‍ വരുന്നതെന്നും ബിജിമോള്‍ പറഞ്ഞു. ഇനി എന്തെങ്കിലും പ്രശ്‌നമുണ്ടെങ്കില്‍ വീണ്ടും ലൈവില്‍ വരുമെന്നും ബിജിമോള്‍ പറഞ്ഞു.
നിലവില്‍ റെഡ് സോണിലായ ഇടുക്കി ജില്ലയില്‍ മൂന്നു പേര്‍ക്കു കൂടി കോവിഡ് സ്ഥിരീകരിച്ചതോടെ ഇവിടെയുടെ രോഗികളുടെ എണ്ണം 17 ആയിരുന്നു.
