തിരുവനന്തപുരം: കൊറോണ നിരീക്ഷണത്തിലുള്ളവരുടെ വിവരങ്ങള് സ്പ്രിങ്ക്ളര് കമ്പനിക്ക് കൈമാറിയതിനെക്കുറിച്ചുള്ള ചോദ്യങ്ങള് പത്രസമ്മേളനം തുടരെ ഉയര്ന്നപ്പോള് വിറളി പിടിച്ച് മുഖ്യമന്ത്രി. വിവാദവിഷയങ്ങളില് അഭിപ്രായം തേടിയതോടെയാണ് പിണറായി വിജയന് അസ്വസ്ഥനായത്. തുടര്ന്ന് ഉടന് തന്നെ പത്രസമ്മേളനം ഉപേക്ഷിക്കുന്നതായും ഇനി എല്ലാ ദിവസവും വൈകുന്നേരങ്ങളില് നടത്താറുള്ള പത്രസമ്മേളനങ്ങള് കാണില്ലെന്നും അദേഹം വ്യക്തമാക്കി. ഉറുമ്പുകള്ക്ക് ഭക്ഷണം കൊടുക്കുന്ന കാര്യത്തില് പോലും ശ്രദ്ധയുള്ള മുഖ്യമന്ത്രി പല കാര്യത്തിലും മറുപടി പറയുന്നില്ലെന്ന് മാധ്യമപ്രവര്ത്തകര് പറഞ്ഞു. ഇതോടെ അസ്വസ്ഥനായ മുഖ്യമന്ത്രി നാളെ മുതല് വൈകുന്നേരങ്ങളില് ഈ കൂടിക്കാഴ്ച ഉണ്ടാവില്ല. ഇനി മുതല് ഇടവിട്ട ദിവസങ്ങളില് നമുക്ക് കാണാമെന്ന് പറഞ്ഞ് ചോദ്യങ്ങളോട് പ്രതികരിക്കാതെ പത്രസമ്മേളനം ഉപേക്ഷിച്ച് മുങ്ങുകയായിരുന്നു.
അതേസമയം സ്പ്രിങ്ക്ളര് ആരോഗ്യരംഗത്തെ ഭീമന്മാരും വന്കിട മരുന്നുകമ്പനികളുമടക്കം ഉപഭോക്താക്കളായിട്ടുള്ള വിവാദ കമ്പനി അമേരിക്കയില് ഡാറ്റാ തട്ടിപ്പ് കേസില് പ്രതിയാണെന്നുള്ള ആരോപണം ഉയര്ന്നിരുന്നു. ഇക്കാര്യവും മാധ്യമപ്രവര്ത്തകര് മുഖ്യമന്ത്രിയോട് ചോദിച്ചിരുന്നു. എന്നാല്, ഇതില് നിന്നും അദേഹം ഒഴിഞ്ഞുമാറി. രോഗബാധിതരുടെയും നിരീക്ഷണത്തിലുള്ളവരുടെയും 41 വിവരങ്ങളാണ് സോഫ്റ്റ്വെയറില് നല്കുന്നത്. ഓരോരുത്തരുടെയും ഉയരവും തൂക്കവും മുതല് അസുഖവിവരവും മരുന്നുകളുടെ വിവരങ്ങളും ബന്ധുക്കളുടേതടക്കം ഫോണ്നമ്പരുമടങ്ങുന്ന വിവരങ്ങളാണ് കമ്പനിക്ക് കൈമാറിയിട്ടുള്ളത്.
വിവരശേഖരണം മാത്രമല്ല, അവയുടെ സ്റ്റാറ്റിസ്റ്റിക്കല് അനാലിസിസ് (വിവരങ്ങളുടെ താരതമ്യ പഠനം) നടത്തുന്ന കമ്പനി ആണ് സ്പ്രിങ്ക്ളര് എന്നത് ആരോപണത്തിന്റെ ഗൗരവം വര്ധിപ്പിക്കുന്നു. ആരോഗ്യ വിവരങ്ങള് ലഭിക്കുന്നതിലൂടെ സംസ്ഥാനത്ത് ഏത് മരുന്നാണ് അല്ലെങ്കില് ഏത് ആരോഗ്യ ഉപകരണമാണ് കൂടുതല് ആവശ്യം എന്നറിഞ്ഞ് കമ്പനികള്ക്ക് വിവരം നല്കാം. മാത്രമല്ല ഓരോരുത്തരുടെയും രോഗ പ്രതിരോധ ശേഷി പോലും നിശ്ചയിച്ച് കമ്പനികള്ക്ക് നല്കാന് കഴിയും. ഇതനുസരിച്ച് കമ്പനികള് നിര്മിക്കുന്ന മരുന്നുകളുടെ വലിയ മാര്ക്കറ്റായി സംസ്ഥാനത്തെ മാറ്റാം.
ഇന്ഷുറന്സ് കമ്പനികള്ക്ക് ആവശ്യമായ വിവരങ്ങള് നല്കാനുള്പ്പെടെ ഈ വിവരങ്ങള് ഉപയോഗിക്കാം. രാജ്യാന്തരതലത്തില് മരുന്നുകമ്പനികള് നടത്തുന്ന മത്സരത്തിന് വിവരങ്ങള് ശേഖരിക്കുന്നത് ഇത്തരം കമ്പനികളിലൂടെയാണ്. ലണ്ടനില് കൊറോണ രോഗികളുടെ വിവരങ്ങള് ഒരു സ്വകാര്യ കമ്പനി മറിച്ച് വിറ്റത് വലിയ വിവാദമായിട്ടുണ്ടെന്നതും സംഭവത്തിന്റെ ഗൗരവം വര്ധിപ്പിക്കുന്നുവെന്ന് വിവര വിശകലന വിദഗ്ധര് പറയുന്നു.ടെലികോളര് മാര്ക്കറ്റിങ് കമ്പനികള് മുതല് വന്കിട മരുന്നു കമ്പനികള്ക്ക് വരെ ഈ വിവരങ്ങള് ദുരുപയോഗം ചെയ്യാം.
രാജ്യാന്തര കരാറുകളില് ഏര്പ്പെടുമ്പോള് പാലിക്കേണ്ട നിബന്ധനകളൊന്നും സ്പ്രിങ്ക്ളര് കമ്പനിയുമായുള്ള കരാറില് പാലിച്ചിട്ടില്ല. കേന്ദ്രസര്ക്കാര് അനുമതിയോടെ ചെയ്യേണ്ട കാര്യങ്ങള്പോലും പാലിക്കാതെയാണ് കമ്പനിക്ക് കരാര് നല്കിയത്.
സംസ്ഥാന സര്ക്കാരിനായി ഇ – ഹെല്ത്ത് പ്രവൃത്തികള് ചെയ്യുന്ന കമ്പനിയെപോലും ഒഴിവാക്കിയാണ് പുതിയ കമ്പനിക്ക് വിവരങ്ങള് കൈമാറിയത്. നിയമനടപടി സ്വീകരിക്കണമെങ്കില് ന്യൂയോര്ക്കിലെ കോടതിയെ സമീപിക്കണമെന്ന കരാറിലെ വ്യവസ്ഥ ദുരൂഹമാണെന്നും സോഫ്റ്റ്വെയര് രംഗത്തെ വിദഗ്ധര് ചൂണ്ടിക്കാട്ടുന്നു. കരാറിലെ തട്ടിപ്പ് എല്ലാവര്ക്കും മനസിലായതോടെയും ഇനിയുള്ള ദിവസങ്ങളില് ഇക്കാര്യത്തെക്കുറിച്ച് ചോദ്യം ഉയരുമെന്നും കണ്ടാണ് പത്രസമ്മേളനങ്ങള് ഉപേക്ഷിച്ചതെന്നും ആക്ഷേപം ഉയര്ന്നിട്ടുണ്ട്.
