തിരുവനന്തപുരം: കൊറോണ വൈറസില് നിന്നും രക്ഷ നേടാന് നമ്മള് ഓരോരുത്തരും എന്തൊക്കെയാണ് ചെയ്യേണ്ടതെന്ന് കാണിച്ചു തരുകയാണ് നേമം മണ്ഡലത്തിലെ ഒരുകൂട്ടം യുവാക്കളുടെ ‘കൊറോണ അവയര്നെസ് വീഡിയോ’.
ബസ്സ് സ്റ്റോപ്പിലേയ്ക്ക് കൊറോണ ബാധിതനായ ഒരാള് എത്തുന്നതു മുതലാണ് വീഡിയോ ആരംഭിക്കുന്നത്. മാസ്ക് ധരിക്കാതെ അദ്ദേഹം ബസ്സ് സ്റ്റോപ്പിലെ വിശ്രമ കേന്ദ്രത്തിലിരിക്കുകയും മൂക്കു ചീറ്റുകയും പരിസരങ്ങളില് തൊടുകയും ചെയ്യുന്നു.തുടര്ന്ന് ഇദ്ദേഹം പോകുകയും മറ്റ് രണ്ടുപേര് ഇവിടെ എത്തുകയും ചെയ്യുന്നു. അവര് ഈ കൊറോണ രോഗിയായി ചിത്രീകരിച്ചിരിക്കുന്ന വ്യക്തി തൊട്ട സ്ഥലങ്ങളില് തൊടുന്നു. ഇവര് ബസ്സില് കയറി വീട്ടില് പോകുന്നതാണ് വീഡിയോയിലെ അടുത്ത രംഗം.
ഇവര് വീടുകളില് എത്തിയതിന് ശേഷമുള്ളതാണ് വീഡിയോയിലെ പ്രധാന ഭാഗം. ഒരാള് വീട്ടില് എത്തിയാല് ഉടനെ മകനെ കയ്യിലെടുത്ത് ലാളിക്കുകയും മുത്തം നല്കുകയും ചെയ്യുന്നു. എന്നാല് അടുത്തയാള് വീട്ടില് എത്തിയിട്ട് ഉടന് ദേഹമാസകലം ശുചിയാക്കിയിട്ടാണ് കുട്ടിയെ ലാളിപ്പിക്കുന്നത്.
കൊറോണ വൈറസിനെ പ്രതിരോധിക്കാനുള്ള രണ്ട് പ്രധാന ഉപാധികള്, സോപ്പുകൊണ്ട് കൈ കഴുകുകയും. മാസ്ക് ധരിക്കുകയുമാണെന്ന് അറിയാം. എന്നാല് ഫലപ്രദമാകണമെങ്കില് എപ്പോള് എങ്ങനെയെല്ലാം എങ്ങനെയൊക്കെ എത്രനേരം എന്നു കാണിച്ചു തരുകയാണ് ഈ വീഡിയോ.
എനിയ്ക്ക് വരില്ല എന്ന വിവരമില്ലായ്മയല്ല വേണ്ടത്, മറിച്ച് എനിയ്ക്കും വരാം ഞാന് കാരണം ആര്ക്കും വരരുത് എന്ന വിവേകമാണ് വേണ്ടതെന്ന സന്ദേശം നല്കിയാണ് വീഡിയോ അവസാനിക്കുന്നത്.
നമ്മള് ഓരോരുത്തരും കയ്യെങ്ങനെ കഴുകണമെന്ന കേരളാ പോലീസിന്റെ വീഡിയോയ്ക്ക് ശേഷം ഇന്ന് സോഷ്യല് മീഡയയില് തരംഗമായിരിക്കുകയാണ് ഈ വീഡിയോ. നാലു മിനിട്ടാണ് വീഡിയോയുടെ ദൈര്ഘ്യം. ഇതിനോടകം തന്നെ ആയിരക്കണിനുപേര് ഈ വീഡിയോ സോഷ്യല് മീഡിയ വഴി കണ്ടുകഴിഞ്ഞു. കേരളാ പോലീസിന്റെ ഒഫിഷ്യല് ഫെയ്സ്ബുക്ക് പേജിലും ഈ വീഡിയോ ഉദ്യോഗസ്ഥര് ഷെയര് ചെയ്തിട്ടുണ്ട്.
കൊറോണ വൈറസിനെ പിടിച്ചുകെട്ടാന് ശ്രമിക്കുന്ന സര്ക്കാരിനും, ആരോഗ്യ വകുപ്പിനും, പോലീസിനും വീഡിയോ സല്യൂട്ട് നല്കുന്നുണ്ട്. അഭിജിത്ത് എം നായരുടെ സംവിധാനത്തില് നേമം മണ്ഡലത്തിലെ ഒരു കൂട്ടം സിനിമ പ്രവര്ത്തകരായ രമേശ് സുകുമാരന്, അരവിന്ദ് അജിത്, അഖിലേഷ് മുരുകന്, ശ്രീജിത്ത് എം നായര്, അജിത് വെണ്ണിയൂര്, വിഷ്ണു ശര്മ്മ, രശ്മി കാര്ത്തിക എന്നിവര് ചേര്ന്നൊരുക്കിയതാണ് ഈ അവബോധന വീഡിയോ.
