ദുബായ്; കോവിഡ് 19 ഭീഷണിയെത്തുടര്ന്ന് ഭാരതം മുഴുവന് ‘ലോക്ക് ഡൗണ് ‘ ആയി പ്രഖ്യാപിക്കപ്പെട്ട പശ്ചാത്തലത്തില് സംസ്ഥാനത്തിന് സഹായ ഹസ്തവുമായി എത്തിയിരിക്കുകയാണ് ഏരീസ് ഗ്രൂപ്പ്. പ്രതിസന്ധി ഘട്ടങ്ങളില് പൊതുവായി ചെയ്യാറുള്ള സാമൂഹ്യ ക്ഷേമപദ്ധതി എന്നതിനപ്പുറം ഇപ്പോഴത്തെ അടിയന്തിര സാഹചര്യത്തില് ആരോഗ്യ മേഖലയ്ക്ക് കരുത്ത് പകരാനുള്ള പദ്ധതിയുമായാണ് യുഎഇ ആസ്ഥാനമായ ഏരീസ് ഗ്രൂപ്പിന്റെ സിഇഒ ഡോക്ടര് സോഹന് റോയ് രംഗത്ത് വന്നിരിക്കുന്നത്.
ലോക്ക് ഡൗണില് പെട്ട് പോയവര്ക്ക് ഭക്ഷണം വിതരണം ചെയ്യുക എന്നതിനേക്കാള് ഗുരുതരാവസ്ഥയില് കിടക്കുന്ന രോഗികള്ക്ക് വെന്റിലേറ്ററുകള് സംഭാവന നല്കുക എന്നതിന് പ്രാധാന്യം നല്കേണ്ടതിന്റെ ആവശ്യകത അദ്ദേഹം എടുത്തു പറഞ്ഞു ‘ കേരളത്തിലെ ആരോഗ്യമേഖല വളരെ സ്തുത്യര്ഹമായ സേവനമാണ് കാഴ്ച്ച വയ്ക്കുന്നതെങ്കിലും വെന്റിലേറ്ററുകള് ഇല്ലാത്ത ഒരു അവസ്ഥ വന്നാല് ആരോഗ്യ രംഗം നിശ്ചലമാകും. രോഗികളുടെ എണ്ണം അഭൂതപൂര്വ്വമായി വര്ധിക്കുന്ന ഒരു സാഹചര്യം സംജാതമായാല് വെന്റിലെറ്ററുകള്ക്ക് കടുത്ത ദൗര്ലഭ്യം അനുഭവപ്പെടും. ഇത് കണക്കിലെടുത്ത് കേരളത്തിലെ പത്ത് ജില്ലകള്ക്ക് ഓരോ വെന്റിലേറ്ററുകള് വീതം സംഭാവന നല്കാന് ഏരീസ് ഗ്രൂപ്പ് തീരുമാനിക്കുന്നതോടൊപ്പം, മറ്റുള്ള കമ്പനികളും ഇതേ മാതൃക പിന്തുടര്ന്ന് നമ്മുടെ ആരോഗ്യ വകുപ്പ് നേരിട്ടേക്കാവുന്ന ഒരു പ്രതിസന്ധിക്ക് പരിഹാരം ഉണ്ടാക്കണമെന്നും അഭ്യര്ത്ഥിക്കുകയാണ് ‘ ലോക്ക് ഡൗണ് പ്രഖ്യാപിച്ചതിന് പിന്നാലെ അദ്ദേഹം വ്യക്തമാക്കി.
ഇതോടൊപ്പം, രണ്ടായിരം പാവപ്പെട്ട കുടുംബങ്ങളുടെ സംരക്ഷണം ലോക്ക് ഡൗണ് കാലത്ത് ഏറ്റെടുക്കാന് സ്ഥാപനത്തിലെ ജീവനക്കാരോടും സോഹന് റോയ് ആവശ്യപ്പെട്ടു.
ഇത് പ്രകാരം സ്ഥാപനത്തിലെ ഓരോ ജീവനക്കാരനും, നിത്യവൃത്തിക്ക് ബുദ്ധിമുട്ടുന്ന ഒരു പാവപ്പെട്ട കുടുംബത്തെ കണ്ടെത്തി സംരക്ഷിക്കുകയും അവരുടെ ജീവിതാവശ്യങ്ങള് നിറവേറ്റാന് സഹായിക്കുകയും ചെയ്യാവുന്നതാണ്.
പ്രകൃതി ദത്തമോ മനുഷ്യ നിര്മ്മിതമോ എന്ന് നോക്കാതെ ദുരന്തങ്ങള് ഉണ്ടായപ്പോഴൊക്കെ കൃത്യമായ സാമൂഹ്യ സുരക്ഷാ പദ്ധതികള് ഏരീസ് ഗ്രൂപ്പ് ആവിഷ്കരിച്ച് നടപ്പിലാക്കിയിട്ടുണ്ട്. രണ്ടായിരത്തിപ്പതിനഞ്ചിലെ നേപ്പാള് ദുരന്തത്തെത്തുടര്ന്ന് വീട് നഷ്ടപ്പെട്ടവര്ക്കായി ഇരുനൂറിലധികം പാര്പ്പിടങ്ങള് നിര്മ്മിക്കാന് ഗ്രൂപ്പ് മുന്കൈ എടുത്തിരുന്നു. കേരളത്തില് വെള്ളപ്പൊക്കദുരന്തം ഉണ്ടായതിനെത്തുടര്ന്നുണ്ടായ രക്ഷാപ്രവര്ത്തങ്ങളിലും പുനരധിവാസപദ്ധതികളിലും ഏരീസ് ടീം നടത്തിയ പ്രവര്ത്തനങ്ങള് പ്രശംസ പിടിച്ചു പറ്റിയിരുന്നു.
