ധര്മശാല: ഇന്ത്യയും ദക്ഷിണാഫ്രിക്കയും തമ്മിലുള്ള ഏകദിന പരമ്പരയിലെ ആദ്യ മത്സരം ഒരു പന്തുപോലും എറിയാതെ ഉപേക്ഷിച്ചു. കനത്ത മഴ കാരണമാണ് കളി ഉപേക്ഷിച്ചത്. പരമ്പരയിലെ രണ്ടാം മത്സരം 15ന് ലഖ്നൗവില് നടക്കും. മൂന്നാം മത്സരം 18ന് കൊല്ക്കത്തയിലാണ്. ഈ വേദിയില് മഴമൂലം തുടര്ച്ചയായ രണ്ടാം തവണയാണ് മത്സരം ഉപേക്ഷിക്കുന്നത്. ഇതിനു മുന്പ് ഇവിടെ നടന്ന അവസാന രാജ്യാന്തര മത്സരവും മഴമൂലം ഉപേക്ഷിച്ചിരുന്നു. കഴിഞ്ഞ വര്ഷം സെപ്തംബറില് ഇന്ത്യയും ദക്ഷിണാഫ്രിക്കയും തമ്മിലുള്ള ടി 20 കളിയാണ് ഉപേക്ഷിച്ചത്.
ചൊവ്വ രാത്രി മുതല് ധര്മശാലയില് കനത്ത മഴയായിരുന്നു. ഇന്നലെ രാവിലെ മഴ മാറിയെങ്കിലും പിന്നീട് ഇന്ത്യന് ടീമിന്റെ പരിശീലനത്തിനുശേഷവും കനത്ത മഴ പെയ്തു. മഴ തുടര്ന്നതോടെ രണ്ടു തവണ ഗ്രൗണ്ട് പരിശോധിച്ച അമ്പയര്മാര് മത്സരം ഉപേക്ഷിക്കാന് തീരുമാനിക്കുകയായിരുന്നു.കൊറോണ വ്യാപനത്തെ തുടര്ന്ന് ശേഷിക്കുന്ന രണ്ട് മത്സരങ്ങളും അടച്ചിട്ട സ്റ്റേഡിയത്തിലാവും നടക്കുക.
