ലണ്ടന്: ബ്രിട്ടണില് കൊറോണ ബാധിച്ച് ഇന്ത്യന് വംശജന് മരിച്ചു. എണ്പതുകാരനായ മനോഹര് കൃഷ്ണ പ്രഭുവാണ് മരിച്ചത്. വാട്ഫോര്ഡ് ജനറല് ആശുപത്രിയില് തിങ്കളാഴ്ച രാത്രിയാണ് മരണം സംഭവിച്ചത്. ബ്രിട്ടണില് കൊറോണ ബാധിച്ച് മരിക്കുന്ന ആറാമത്തെയാളാണ് മനോഹര്.
മനോഹറുമായി അടുത്ത് ഇടപഴകിയവരെ കണ്ടെത്താനുള്ള ശ്രമം ആരംഭിച്ചതായി ആരോഗ്യ പ്രവര്ത്തകര് വ്യക്തമാക്കി. ബ്രിട്ടണില് കൊറോണ വൈറസ് ബാധിച്ച് മരണപ്പെടുന്ന ആദ്യത്തെ ഇന്ത്യന് വംശജനാണ് മനോഹര്. അദ്ദേഹത്തിന്റെ മകന് ഇപ്പോഴും ആശുപത്രിയില് ചികിത്സയിലാണ്. പത്ത് ദിവസം മുമ്പാണ് രോഗ ലക്ഷണങ്ങളുമായി അദ്ദേഹം ആശുപത്രിയില് പോയത്.
തന്റെ മകനെ കാണാന് വീട്ടില് വന്ന ഒരു ഇറ്റാലിയന് വ്യക്തിയില് നിന്നാണ് മനോഹറിന് വൈറസ് ബാധിച്ചതെന്ന് അദ്ദേഹത്തിന്റെ സുഹൃത്ത് പറഞ്ഞു. ആ ഇറ്റാലിയന് യുവാവ് രോഗം ബാധിച്ച് ചികിത്സയില് കഴിയുകയാണെന്നും അദ്ദേഹം കൂട്ടിച്ചേര്ത്തു.
