കട്ടപ്പന: രാജ്യത്തെ കമ്പിത്തപാല് വകുപ്പിന്റെ ചരിത്രത്തില് ശ്രദ്ധേയമായ സ്ഥാനം നേടിയ ടെലിഗ്രാം സര്വീസ് (കമ്പിയില്ലാ കമ്പി) നിര്ത്തലാക്കിയിട്ട് ഇന്ന് 13 വര്ഷം തികയുകയാണ്. 2013ലാണ് അത്യാധുനിക സാങ്കേതിക വിദ്യ സര്വ്വസാധാരണയായി മാറിയതോടെ ചരിത്രത്തില് ഇടം നേടിയ ടെലിഗ്രാം സേവനം തപാല് വകുപ്പ് നിര്ത്തലാക്കിയത്.
1832ല് ഇലട്രിക് ടെലിഗ്രാഫ് കണ്ടുപിടിച്ചത് ബാരോണ് ഷില്ലിംഗ് എന്ന ശാസ്ത്രജ്ഞനാണ്. എന്നാല് മോഴ്സ് കോഡ് ഉപയോഗിച്ച് സന്ദേശങ്ങള് കൈമാറാന് കഴിയുന്ന പരിഷ്കരിച്ച ടെലിഗ്രാഫ് വികസിപ്പിച്ചെടുത്തത് സാമുവല് മോഴ്സ് ആണ്. ഇത് 1836ല് ആയിരുന്നു. 1844 മെയ് 24നാണ് മോഴ്സ് കോഡ് ഉപയോഗിച്ച് സാമുവല് ആദ്യ സന്ദേശമയച്ചത്. ഇംഗ്ലീഷ് അക്ഷരങ്ങളെ കുത്തും വരകളും അടങ്ങുന്ന കോഡ് ഭാഷയില് വൈദ്യുത തരംഗങ്ങളാക്കി മാറ്റി എത്ര ദൂരത്തേക്ക് വേണമെങ്കിലും സന്ദേശങ്ങള് അയക്കാമെന്നാണ് അദ്ദേഹം കണ്ടെത്തിയത്. പിന്നീടിത് മോഴ്സ് കോഡ് എന്നറിയപ്പെട്ടു. ഇതൊരു ചരിത്ര സംഭവമായിട്ടാണ് രേഖപ്പെടുത്തപ്പെട്ടത്.
ഇന്ത്യയില് പരീക്ഷണാടിസ്ഥാനത്തില് ടെലിഗ്രാഫ് സേവനം ആരംഭിച്ചത് ബ്രിട്ടീഷ് ഭരണകാലത്ത് ഡല്ഹൗസി പ്രഭു ഗവര്ണറായിരുന്നപ്പോള് ബ്രിട്ടീഷ് ഡോക്ടറായിരുന്ന വില്യം ഒഷൗഗ്നസ്സ് ആണ്. 1850 നവംബര് അഞ്ചിന് കൊല്ക്കത്തയില് നിന്ന് ഡയമണ്ട് ഹാര്ബറിലേക്ക് 50 കി.മീ ദൂരത്തില് സ്ഥാപി ച്ച വൈദ്യുതി ടെലിഗ്രാഫ് ലൈസിലൂടെ ആദ്യ സന്ദേശം അയച്ചത്. ഈസ്റ്റിന്ത്യ കമ്പനിയുടെ ഔദ്യോഗിക ആവശ്യങ്ങള്ക്കായി 1851ലാണ് ടെലിഗ്രാഫ് സേവനം ആരംഭിച്ചത്. ഇതിനായി പ്രത്യേകവകുപ്പ് തുടങ്ങിയതും പൊതുജനങ്ങള്ക്കായി ഈ സേവനം ലഭ്യമാക്കിയതും 1853ലാണ്.
1854ല് ഇന്ത്യയില് 4000 ടെലിഗ്രാഫ് ലൈനുകള് സ്ഥാപിച്ച് കമ്പിയില്ലാക്കമ്പിയുടെ സേവനം വിപുലമാക്കി. 1885 ലാണ് ഇന്ത്യന് ടെലിഗ്രാഫ് ആക്ട് നിലവില് വന്നത്. 1995ല് ഇന്റര്നെറ്റ് സൗകര്യം ലഭ്യമായതോടെയാണ് ടെലിഗ്രാഫ് സേവനത്തിന് ആവശ്യക്കാര് കുറഞ്ഞത്. അമേരിക്കയില് 2006 ജനുവരി 27ന് തന്നെ ടെലിഗ്രാഫ് സേവനം നിര്ത്തിയിരുന്നു. ടെലിഗ്രാം സേവനം കൊണ്ട് മാത്രം ഇന്ത്യന് കമ്പിത്തപാല് വകുപ്പിന് 400 കോടി രൂപയുടെ നഷ്ടം ഉണ്ടായതോടെയാണ് 2013ല് ഈ സേവനം അവസാനിപ്പിക്കാന് തീരുമാനിച്ചത്. ഇതോടെയാണ് ലോകത്ത് തന്നെ ടെലിഗ്രാഫ് യുഗം അവസാനിച്ചത്.
ഇന്ത്യയില് 160 വര്ഷത്തെ സേവനത്തിന്റെ പ്രതാപവുമായിട്ടാണ് കമ്പിയില്ലാക്കമ്പി ചരിത്രത്തിലേക്ക് വഴി മാറിയത്.
ജന്മഭൂമി ഓണ്ലൈന്