കൊച്ചി: പാലാരിവട്ടം മേല്പ്പാലം നിര്മാണത്തിലെ അഴിമതിപ്പണം മുസ്ലിംലീഗ് മുഖപത്രം ചന്ദ്രികയുടെ അക്കൗണ്ട് വഴി മുന്മന്ത്രി വി.കെ. ഇബ്രാഹിംകുഞ്ഞ് വെളുപ്പിച്ചുവെന്ന പരാതി നില്ക്കെ ചെയര്മാന് കൂടിയായ ഇബ്രാഹിംകുഞ്ഞ് പത്രത്തിന്റെ ഗവേണിങ് ബോഡിയോഗം വിളിച്ചുകുട്ടുന്നതിനെതിരെ പരാതി.
ചന്ദ്രികയുടെ ബാങ്ക് അക്കൗണ്ട് ദുരുപയോഗം ചെയ്തതു സംബന്ധിച്ച ഹൈക്കോടതിയിലെ കേസില് നിന്ന് രക്ഷപ്പെടാനുള്ള രേഖകള് ശരിയാക്കാനാണ് പെട്ടെന്ന് ഒരു ഗവേണിങ് ബോഡി യോഗം വിളിച്ചു കൂട്ടിയിരിക്കുന്നതെന്നാണ് ചന്ദ്രികയിലെ മുതിര്ന്ന ജീവനക്കാരുടെ ആരോപണം.
മൂന്നു വര്ഷത്തിനു ശേഷം കൂടുന്ന യോഗത്തില് പതിവിനു വിപരീതമായി അഞ്ചു മാസത്തെ വരവ്-ചെലവ് കണക്കുകള് മാത്രം അജണ്ടയില് ഉള്പ്പെടുത്തിയിരിക്കുന്നതില് ദുരൂഹതയുണ്ടെന്ന് ഒരു സീനിയര് ഡയറക്ടര് പറഞ്ഞു. ഈ വര്ഷം ജൂണ്, ജൂലൈ, ആഗസ്ത്, സപ്തംബര്,ഒക്ടോബര് മാസങ്ങളിലെ കണക്കുകള് മാത്രം അജണ്ടയില് ഉള്പ്പെടുത്തിയിരിക്കുന്നതിനു പിന്നിലുള്ള നീക്കവും സംശയകരമാണ്.
ചന്ദ്രിക പ്രിന്ററും പബ്ലിഷറുമായ പി.കെ.കെ. ബാവയെയും, പാര്ട്ടിയുടെ പ്രധാനപ്പെട്ട സംസ്ഥാന നേതാക്കളെയും ഒഴിവാക്കി യോഗം വിളിച്ചതില് ചന്ദ്രിക ജീവനക്കാരും സബ് എഡിറ്റര്മാരും കുഞ്ഞാലിക്കുട്ടിയെ സമീപിച്ച് പരാതി അറിയിച്ചിട്ടുണ്ട്. അബ്ദുള് വഹാബ് എംപിയുടെ നിര്ദേശത്തെ തുടര്ന്നാണ് ഇവര് കുഞ്ഞാലിക്കുട്ടിയെ കണ്ടത്.
പത്തുകോടി രൂപയുടെ വിവാദം നിലനില്ക്കുമ്പോള് കൃത്രിമ കണക്കുകള് ഉണ്ടാക്കാനാണ് നീക്കം നടക്കുന്നതെന്നും നാലു കോടി രൂപ ഇബ്രാഹിം കുഞ്ഞിന്റെ സ്ഥാപനത്തിന്റെ പേരിലേക്ക് മാറ്റിയതിന്റെ വിശദീകരണം നല്കാനുമാണ് യോഗം വിളിച്ചിരിക്കുന്നതെന്നാണ് കൊച്ചി യൂണിറ്റിലെ ഒരു ഉദ്യോഗസ്ഥന് പറഞ്ഞത്.
തൃശൂര്, എറണാകുളം, ഇടുക്കി, കോട്ടയം, ആലപ്പുഴ, പത്തനംതിട്ട എന്നീ ജില്ലകളിലെ മുസ്ലിംലീഗ് ജില്ലാ പ്രസിഡന്റുമാരും സെക്രട്ടറിമാരും ഈ ജില്ലകളില് നിന്നുള്ള സംസ്ഥാന ഭാരവാഹികളെയുമാണ് യോഗത്തിലേക്ക് ക്ഷണിച്ച് കൊച്ചി യൂണിറ്റ് ഗവേണിങ് ബോഡി ചെയര്മാന് ഇബ്രാഹിംകുഞ്ഞ് ഒപ്പിട്ട പ്രത്യേക കത്ത് അയച്ചിരിക്കുന്നത്. എറണാകുളത്തെ ചന്ദ്രിക ഓഫീസില് ഇന്ന്് വൈകിട്ട് മൂന്നിനാണ് യോഗം.
ശമ്പളം കൃത്യമായി കിട്ടാത്തതിലും പല ആനുകൂല്യങ്ങളും മുടങ്ങി കിടക്കുന്നതിനാലും ചന്ദ്രിക ജീവനക്കാരുടെ പ്രതിഷേധം ഉണ്ടാകാന് സാധ്യതയുള്ളതിനാല് വളരെ രഹസ്യമായാണ് കത്ത് അയച്ചിരിക്കുന്നത്.
ചന്ദ്രിക പത്രത്തിന്റെ ഗവേണിങ് ബോഡി ക്ഷണിച്ചുള്ള കത്ത്
