തൊടുപുഴ: സാമ്പാറും അവിയലുമൊക്കെ ഉണ്ടാക്കാനുള്ള പച്ചക്കറി തെരഞ്ഞെടുക്കുമ്പോള് ആ ലിസ്റ്റില് കുറച്ചു നാളത്തേക്ക് മുരിങ്ങക്ക ഉണ്ടാകില്ല. കാരണം തൊട്ടാല് പൊള്ളുന്ന വില വര്ധനവ് തന്നെ.
കിലോയ്ക്ക് 280 മുതല് 300 രൂപ വരെയായിരുന്നു കഴിഞ്ഞ ദിവസങ്ങളില് മുരിങ്ങക്കായുടെ ചില്ലറ വില. രണ്ടാഴ്ച മുന്പു കിലോയ്ക്ക് 100 രൂപയായിരുന്നു വില. തമിഴ്നാട്ടില്നിന്ന് മുരിങ്ങക്ക വരാത്തതും നാട്ടില് വിളവില്ലാത്തതുമാണ് മുഖ്യകാരണം. ഒഡിഷ, ഗുജറാത്ത് എന്നിവിടങ്ങളില്നിന്ന് കൂടുതല് മുരിങ്ങക്കായയെത്തുമെന്ന് പ്രതീക്ഷിക്കുന്നതായി കടക്കാര് പറഞ്ഞു.
വില കൂടിയതോടെ മുരിങ്ങക്കായ വാങ്ങാനും ആളില്ലാതായി. മിക്ക ചില്ലറ വില്പന ശാലകളിലും ഇപ്പോള് മുരിങ്ങക്കായ കാണാനില്ല. മുരിങ്ങക്കയുടെ വില ഇനിയും ഉയരാന് സാധ്യതയുണ്ടെന്ന് കച്ചവടക്കാര് പറയുന്നു.
സവോള, ഉള്ളി എന്നിവയുടെ വിലയും കുതിച്ചുയര്ന്നിരിക്കുകയാണ്. ബിരിയാണിക്ക് അവശ്യമായ സവോളയുടെ ചില്ലറ വില 100 രൂപയാണ്. വെളുത്തുള്ളി വില 200ല് എത്തി നില്ക്കുന്നു. ചുവന്നുള്ളിക്കാകട്ടെ 120-140 രൂപ വരെ വില വര്ധിച്ചു.
പച്ചക്കറി വിപണിയില് മറ്റ് ഇനങ്ങളുടെ വില കാര്യമായ മാറ്റമില്ലാതെ തുടരുകയാണെന്നു വില്പനക്കാര് പറയുന്നു. തക്കാളി കിലോയ്ക്ക് 30 രൂപ, ബീന്സ്30, കാരറ്റ്3050, ഇഞ്ചി80, വെണ്ടയ്ക്ക30, വെള്ളരിക്ക30, പടവലം40, കാബേജ്40, വഴുതനങ്ങ50, വള്ളിപ്പയര്40, ബീറ്റ്റൂട്ട്40, മത്തങ്ങ2528 എന്നിങ്ങനെയാണു ചില്ലറ വില. പല കടകളിലും വ്യത്യസ്ത നിരക്കുകളിലാണ് വില്പന.
