തിരുവന്തപുരം: നവോത്ഥാനം എന്നാല് സ്ത്രീകളെ ശബരിമല കയറ്റുന്നതല്ലെന്ന് സിപിഎം നേതാവും കായംകുളം എംഎല്എയുമായി യു പ്രതിഭ. ശബരിമല മണ്ഡലകാലം ആരംഭിച്ച ഇന്നാണ് പ്രതിഭ പിണറായി സര്ക്കാരിന്റെ നിലപാട് തള്ളി രംഗത്തുവന്നത്. പുരോഗമന സമൂഹത്തില് സ്ത്രീകള്ക്ക് നേരെ നടന്ന ആക്ഷേപങ്ങളെ ചെറുക്കാന് പഴയ ഇരുണ്ട കാലത്തേക്ക് നടക്കേണ്ടവരല്ല സ്ത്രീകള് എന്ന് പറയാനാണ് വനിതാ മതില് തീര്ത്തത്. എന്നാല്, എതിര് രാഷ്ട്രീയ പാര്ട്ടിക്കാര് വനിതാ മതിലിനെതിരെ വ്യാപകമായ കള്ളപ്രചരണങ്ങള് അഴിച്ചു വിട്ടു. ഇതിന് ശബരിമല യുവതി പ്രവേശനവുമായി ബന്ധമില്ലെന്നും അവര് പറഞ്ഞുവെയ്ക്കുന്നു. ശബരിമലയില് പ്രശ്നങ്ങള് ഉണ്ടാക്കുന്നതില് മുഖ്യപങ്ക് വഹിക്കുന്നത് മാധ്യമങ്ങളാണെന്നും പ്രതിഭ തന്റെ ഫേസ്ബുക്ക് പോസ്റ്റില് പറയുന്നുണ്ട്.
കുറച്ച് കൂടെ ക്ഷമിച്ചു കൂടെ മാധ്യമങ്ങളെ.. സുപ്രീം കോടതി വിധിയും കൊണ്ട് മല കയറാന് ആരെങ്കിലും വന്നാല് നിങ്ങള് എന്തിനാണ് ക്യാമറയുമായി അവരുടെ പിന്നാലെ പോകുന്നത്. എന്തിനാണ് നമ്മുടെ നാട് കത്തിക്കാന് കൂട്ട് നില്ക്കുന്നതെന്നും പ്രതിഭ ചോദിക്കുന്നു. ശബരിമല ധര്മ്മശാസ്താവേ 10 വോട്ടിന് വേണ്ടി ഒരു നേരത്തെ വാര്ത്തക്കുവേണ്ടി ഈ നാട് നശിപ്പിക്കാന് നോക്കുന്നവരെ അങ്ങ് തന്നെ ഒന്ന് ശ്രദ്ധിച്ചേക്കണേയെന്നും പ്രതിഭ ഫേസ്ബുക്ക് പോസ്റ്റില് പറയുന്നു.
നേരത്തെയും പിണറായി സര്ക്കാരിലെ മന്ത്രിയെ വിമര്ശിച്ച് പ്രതിഭ ശ്രദ്ധനേടിയിരുന്നു. അന്ന് ആരോഗ്യ മന്ത്രി കെ കെ ശൈലജയുടെ പോസ്റ്റില് പ്രതിഭ കമന്റ് ഇട്ടതോടെയാണ് പ്രശ്നം തുടങ്ങുന്നത്. തന്റെ മണ്ഡലമായ കായംകുളത്തെ താലൂക്ക് ആശുപത്രിയുടെ വികസനത്തിന് വേണ്ട പരിഗണന ലഭിക്കുന്നില്ലെന്നാണ് കമന്റിലൂടെ പ്രതിഭ വ്യക്തമാക്കിയത്. തനിക്ക് ചെയ്യാവുന്നതെല്ലാം സമയബന്ധിതമായി ചെയ്തിട്ടും ആക്ഷേപം കേള്ക്കുകയാണ്. തങ്ങളെ പോലെയുള്ള എംഎല്എമാര് ഒന്നും ചെയ്യാഞ്ഞിട്ടാണ് ആശുപത്രി വികസനം നടക്കാത്തത് എന്ന രീതിയിലെ പ്രചാരണം വേദന ഉണ്ടാക്കിയിട്ടുണ്ട്. ടീച്ചറില് നിന്ന് അഭിനന്ദനം കിട്ടാന് ആഗ്രഹമുണ്ടെന്നും പ്രതിഭ കുറിച്ചു. എന്നാല്, മന്ത്രി കെകെ ശൈലജയെ ഫേസ്ബുക്കിലൂടെ വിമര്ശിച്ചു എന്ന തരത്തിലാണ് സിപിഎം പ്രവര്ത്തകര് ഈ കമന്റിനെ കണ്ടത്. തുടര്ന്ന് രൂക്ഷമായ സൈബര് ആക്രമണം പ്രതിഭ നേരിടേണ്ടി വന്നിരുന്നു.
ഇതോടെ വിശദീകരണവുമായി പ്രതിഭ രംഗത്തുവന്നിരുന്നു. കായംകുളം താലൂക്ക് ആശുപത്രിയെ കുറിച്ച് ഷൈലജ ടീച്ചറിന്റെ കാത്ത് ലാബുകളെ സംബന്ധിച്ച പോസ്റ്റില് ഇട്ട കമന്റ് ആരും ആഘോഷിക്കേണ്ടതില്ലെന്നും പ്രതിഭ വ്യക്തമാക്കിയിരുന്നു. ആരോഗ്യ വകുപ്പ് മന്ത്രി ചെയ്യുന്ന കാര്യങ്ങളെ അങ്ങേയറ്റം ആദരവോടെ കാണുന്ന സഖാവാണ് ഞാന്. എന്നാല്, താന് പ്രതിനിധീകരിക്കുന്ന കായംകുളം മണ്ഡലത്തിലെ താലൂക്ക് ആശുപത്രിയെ ധനമന്ത്രി ബജറ്റ് മറുപടി പ്രസംഗത്തില് കിഫ്ബിയില് ഉള്പ്പെടുത്തിയതാണ്. നാളിതുവരെ അതിന് പണം അനുവദിക്കപ്പെട്ടില്ല എന്നത് സത്യം തന്നെയാണ്. വികസനവും ജനങ്ങളുടെ ക്ഷേമവും മാത്രമാണ് എന്റെ ലക്ഷ്യമെന്നും പ്രതിഭ കുറിച്ചിരുന്നു.
