ശാസ്താംകോട്ട: കഴിഞ്ഞ മണ്ഡലകാലത്ത് ശബരിമല സ്ത്രീപ്രവേശന കാര്യത്തില് സര്ക്കാര് സ്വീകരിച്ച നിലപാട് കേരളത്തില് സിപിഎമ്മിന്റെ അടിത്തറ ഇളക്കിയെന്ന് പാര്ട്ടി കത്ത്. വനിതാമതിലിന് ശേഷം രണ്ട് സ്ത്രീകളെ ശബരിമലയിലെത്തിച്ചത് നൂറുകണക്കിന് പ്രവര്ത്തകരുടെ മനസ്സിലുണ്ടാക്കിയ ആഘാതം ഒരോ സ്ഥലത്തും ഒരോ രീതിയിലാണ് പാര്ട്ടിയുടെ തകര്ച്ചയ്ക്ക് കാരണമായത്. വരുന്ന മണ്ഡലകാലത്ത് നേതൃത്വവും പ്രവര്ത്തകരും ശ്രദ്ധയോടെ പ്രവര്ത്തിക്കണമെന്നും കത്തില് മുന്നറിയിപ്പ് നല്കുന്നു.
സിപിഎം സംസ്ഥാന കമ്മിറ്റി ഏരിയാ ഘടകങ്ങള്ക്ക് അയച്ച 2019ലെ രണ്ടാം പാര്ട്ടികത്തിലെ ‘അടവുനയം തെരഞ്ഞെടുപ്പ് അവലോകന റിപ്പോര്ട്ടിങ് നോട്ടിലാണ് ‘ഇത് വിവരിക്കുന്നത്. രഹസ്യസ്വഭാവമുള്ള പാര്ട്ടികത്ത് ജില്ലാ കമ്മിറ്റി നിര്ദേശിക്കുന്ന ഏരിയാ ഭാരവാഹികള്ക്കാണ് കൈമാറുന്നത്. ‘ലോക്സഭാ തെരഞ്ഞെടുപ്പില് സിപിഎമ്മിന്റെ പ്രകടനം-കേരളം’ എന്ന തലക്കെട്ടില് പറയുന്ന പാളിച്ചകളിലും നിര്ദേശങ്ങളിലുമാണ് ശബരിമല വിഷയം പാര്ട്ടിയുടെ അടിവേര് തോണ്ടിയതായി തുറന്ന് സമ്മതിക്കുന്നത്.
‘ശബരിമല വിഷയത്തില് സര്ക്കാരിന്റെ പ്രകടനത്തിന് ജനങ്ങള്ക്കിടയില് നല്ല അംഗീകാരം ലഭിക്കുമെന്നായിരുന്നു നാം കരുതിയിരുന്നത്. ഈ കണക്കുകൂട്ടലുകളെല്ലാം തെറ്റിച്ച് പാര്ട്ടി കനത്ത പരാജയമേറ്റുവാങ്ങി. വോട്ടെടുപ്പിന് ശേഷവും ഭൂരിപക്ഷം സീറ്റുകളും നേടാന് കഴിയുമെന്ന് കേരളത്തിലെ സഖാക്കള് പ്രതീക്ഷിച്ചു. എന്നാല്, ഭൂരിപക്ഷം സീറ്റുകളും
പാര്ട്ടിക്ക് നഷ്ടപ്പെട്ടത് ഒരു ലക്ഷത്തിലേറെ വോട്ടുകളുടെ വ്യത്യാസത്തിലാണ്. ഇതിനുള്ള പരിഹാര നടപടി മേഖലകള് തിരിച്ച് പരിശോധിക്കണമെന്നും നിര്ദേശിക്കുന്നു. കേരളത്തില് സീറ്റ് നേടാനുള്ള ബിജെപിയുടെ യത്നങ്ങള് പരാജയപ്പെട്ടെങ്കിലും 15.6 ശതമാനം വോട്ടുകള് നേടുന്നതില് അവര് വിജയിച്ചു. അത് അതിയായ ഉത്കണ്ഠയുളവാക്കുന്നു.
കേരളത്തില് ബിജെപിയുടെ വളര്ച്ച തടയുന്നതിനുള്ള ക്ഷമാപൂര്വവും ഏകോപിതവുമായ രാഷ്ട്രീയ, പ്രത്യയശാസ്ത്ര, സംഘടനാ പ്രവര്ത്തനം ആവശ്യമാണ്. കേരളത്തിലെ യുവാക്കള് പാര്ട്ടിയില് നിന്ന് അകലുന്നത് ഗൗരവകരമായി കാണണം. പഴയതുപോലെയുള്ള ആകര്ഷണം യുവാക്കള്ക്ക് പാര്ട്ടിയോടില്ല. യുവാക്കളെ മുന്നിര്ത്തി പാര്ട്ടി നടത്തിയ പരിപാടികളല്ലാം പരാജയമായിരുന്നു. മുന്പ് പാര്ട്ടിയുടെ അടിത്തറ പാവപ്പെട്ടവരും ഇടത്തരക്കാരുമായിരുന്നു. ഈ വിഭാഗം ഇന്ന് പാര്ട്ടിക്ക് അന്യമായി. ഈ സ്ഥിതി തിരുത്തുന്നതിന് കാലങ്ങളായി പാര്ട്ടി നടത്തുന്ന പ്രവര്ത്തനങ്ങള് ഒരു ഫലവുമുണ്ടാക്കിയിട്ടില്ലെന്നും കത്ത് വിശദീകരിക്കുന്നു.
