തിരുവനന്തപുരം: കാനനവാസന് കാണിക്കയായി മണ്ഡല മകരവിളക്ക് കാലത്ത് മരം നടാന് ആഹ്വാനം ചെയ്ത് ശബരിമല കര്മ്മ സമിതി. ‘മണ്ഡലം ഒന്ന് മരം ഒന്ന്’ എന്ന പേരിലാണ് പുതിയ ഉദ്യമം തുടങ്ങിയിരിക്കുന്നത്. ഒരോ ഭക്തനും മണ്ഡല വ്രതം ആരംഭിക്കുമ്പോള് ഒരു വൃക്ഷത്തൈ നടണം. അത് ഓരോ ദിവസവും നനച്ചു വളര്ത്തണമെന്നും ശബരിമല കര്മ്മ സമിതി ആവശ്യപ്പെട്ടു.
ശബരിമല കര്മ്മസമിതിയുടെ ഫേസ്ബുക്ക് പോസ്റ്റിന്റെ പൂര്ണ്ണരൂപം:
നാല്പത്തി ഒന്ന് ദിവസത്തെ നിഷ്ഠയോടെ ഉള്ള കഠിനമായ മണ്ഡലവ്രതം അനുഷ്ഠിക്കുക വഴി ആരോഗ്യപൂര്ണമായ ശരീരം ലഭിക്കും. മണ്ഡലം ഒരു ജീവിതചര്യ ആണ്.മനസ്സും ശരീരവും ശുദ്ധമാക്കാന് ആണ് നമ്മള് മണ്ഡല വ്രതം അനുഷ്ഠിക്കുക. എല്ലാ ഹിന്ദുക്കളും മണ്ഡല വ്രതം അനുഷ്ഠിക്കുന്നത് ഉത്തമമാണ്.
ശബരിമല തീര്ത്ഥാടനത്തിന് അയ്യപ്പന്മാരെ തയാറാക്കാന് ആണ് മണ്ഡലം അനുഷ്ഠിക്കാന് നിര്ദ്ദേശിക്കുന്നത്. അത് ശരീരവും മനസ്സും ശുദ്ധീകരിക്കുന്നത് കാരണം തീര്ഥാടനം സുഗമമാക്കും.
നമ്മുടെ നന്മക്കായി വ്രതം അനുഷ്ഠിക്കുന്ന നമ്മള് പ്രകൃതിയുടെ നന്മക്കായി ഒരു മരം നടണം.
പ്രകൃതിയും ഈശ്വരനും രണ്ടല്ല എന്ന് പഠിപ്പിച്ച ഒരു മഹത്തായ സസ്കാരത്തിന്റെ വക്താക്കള് ആകണം നമ്മള് ഓരോരത്തരും.
‘മണ്ഡലം ഒന്ന് മരം ഒന്ന്’ എന്ന പേരില് back2roots എന്ന പ്രകൃതി സംരക്ഷണ സമിതിയുടെ ആഹ്വാനം അതിനു വേണ്ടി ആണ്. നമ്മള് മണ്ഡല വ്രതം ആരംഭിക്കുമ്പോള് ഒരു വൃക്ഷത്തൈ നടണം. അത് ഓരോ ദിവസവും നനച്ചു വളര്ത്തണം. ഒരു മണ്ഡലം തികയുമ്പോള്(41 ദിവസം തികയുന്ന നാള്) (ശബരിമലക്ക് കെട്ട് നിറക്കുന്ന ദിവസം ആകുമ്പോഴേക്കും) നിങ്ങള് നട്ട് പിടിപ്പിച്ച തൈക്ക് സാമാന്യമായി ഭൂമിയില് വേരോട്ടം ആയിട്ടുണ്ടാകും. കാനനവാസനായ ഭഗവാന് നിങ്ങള്ക്ക് സമര്പ്പിക്കാന് പറ്റിയ ഏറ്റവും വലിയ ഒരു കാണിക്ക ആകും ആ വൃക്ഷം. കാനനവാസനായി ഒരു മരം നിങ്ങള് നടൂ.. നിങ്ങളുടെ മണ്ഡലവ്രതം സമ്പൂര്ണമാകട്ടെ..
സ്വാമിയേ ശരണമയ്യപ്പാ..
