പീച്ചി : കരാര് നല്കി പത്തുവര്ഷമായിട്ടും ദേശീയപാതാ നിര്മാണം പൂര്ത്തിയായില്ല ഗതാഗതം സുഗമമാക്കണമെന്നാവശ്യപ്പെട്ട് പ്രധാനമന്ത്രി നരേന്ദ്രമോദിക്ക് കത്തയയ്ക്കാനൊരുങ്ങി കുരുന്നുകള്. മണ്ണുത്തി- വടക്കഞ്ചേരി ആറുവരിപ്പാതയുടെ നിര്മാണം പൂര്ത്തിയാക്കാന് ഇടണമെന്നാവശ്യപ്പെട്ടാണ് കത്തയയ്ക്കുന്നത്. തൃശ്ശൂരിന്റെ കിഴക്കന് അതിര്ത്തിയിലെയും പാലക്കാട് ജില്ലയിലെയും യുപി വിഭാഗം കുട്ടികളാണ് പ്രധാനമന്ത്രി നരേന്ദ്രമോദിക്ക് കത്തെഴുതുന്നത്.
ഹിന്ദിയിലും ഇംഗ്ലീഷിലും മലയാളത്തിലുമായി അയ്യായിരത്തോളം കത്തുകള് വരും ദിവസങ്ങളില് പ്രധാനമന്ത്രിക്ക് അയച്ചു നല്കും. വടക്കഞ്ചേരി ചെറുപുഷ്പം ഗേള്സ് ഹയര് സെക്കന്ഡറി സ്കൂളിലാണ് പാലക്കാട് ജില്ലയിലെ കുട്ടികളുടെ കത്തുകള് അയയ്ക്കുന്നതിന്റെ ഉദ്ഘാടനം. മേഖലയിലെ മറ്റ് സ്കൂളുകളിലെ വിദ്യാര്ത്ഥികളും അധ്യാപകരും ചടങ്ങില് പങ്കെടുക്കും.
തൃശ്ശൂര് ജില്ലയിലെ സ്കൂള്ക്കുട്ടികള് ബുധനാഴ്ചയാണ് കത്തുകളയയ്ക്കുക. പട്ടിക്കാട് ഗവ. ഹയര് സെക്കന്ഡറി സ്കൂളിലാണ് ചടങ്ങ്. കുതിരാനിലെ ഗതാഗതപ്രശ്നം നേരിട്ട് ബാധിക്കുന്ന കുട്ടികളാണ് കത്തുകള് അയയ്ക്കുന്നത്. ഹയര് സെക്കന്ഡറി- ബിരുദ വിദ്യാര്ത്ഥികള്, പ്രദേശവാസികള് സമര്പ്പിക്കുന്ന ഭീമഹര്ജിയില് ഒപ്പുവെച്ച് പ്രതിഷേധത്തിന്റെ ഭാഗമാവും.
2009ലാണ് മണ്ണുത്തി- വടക്കഞ്ചേരി ആറുവരിപ്പാത നിര്മാണത്തിനായി കരാര് കൊടുക്കുന്നത്. ഈ വിദ്യാര്ത്ഥികളെല്ലാം ഇപ്പോള് നാല്- അഞ്ച് ക്ലാസ്സുകളിലാണ് പഠിക്കുന്നത്. എന്നിട്ടും ആറുവരിപ്പാത ഇന്നും ശൈശവത്തില് തന്നെ. 2013 ല് ദേശീയ പാത നിര്മാണം പൂര്ത്തിയാക്കി ഗതാഗതം ആരംഭിക്കേണ്ടതായിരുന്നു. എന്നാല് ഇനിയും പൂര്ത്തിയാക്കാത്തതിനാല് ഈറൂട്ടിലെന്നും മണിക്കൂറോകളോളം ഗതാഗത കുരുക്കില് ഏര്പ്പെട്ട് യാത്രക്കാര് വലയുകയാണ്. മഴക്കാലമായാല് യാത്രാ ദുരിതം ജനങ്ങള്ക്ക് ദുസ്സഹമാകും.
പട്ടിക്കാട് സര്ക്കാര് സ്കൂള്, സെന്റ് അല്ഫോന്സ്, താളിക്കോട് ജീവന് ജ്യോതി പബ്ലിക് സ്കൂള്, ചുവന്നമണ്ണ് സ്കൂള്, കൊമ്പഴ, വാണിയമ്പാറ, കല്ലിങ്ങപ്പാടം സര്ക്കാര് ഹയര് സെക്കന്ഡറി സ്കൂള്, പന്തലാംപാടം മേരി മാത ഹയര് സെക്കന്ഡറി സ്കൂള് എന്നിവിടങ്ങളിലെ വിദ്യാര്ത്ഥികള്ക്കാണ് ഇത് ഏറെ പ്രയാസമുണ്ടാക്കുന്നത്. റൂട്ടിലെ ഗതാഗത കുരുക്ക് ഏറിയതോടെ മൂന്നു മാസമായി വിദ്യാര്ഥികള്ക്ക് ക്ലാസ്സില് കൃത്യസമയത്ത് എത്താനാകുന്നില്ല. ഇതുമൂലം സ്കൂള് അധികൃതര്ക്ക് പരീക്ഷ സമയക്രമം പോലും മുന്കൂട്ടി നിശ്ചയിക്കാനാവാതെ വന്നതോടെയാണ് വിദ്യാര്ത്ഥികള് പ്രധാനമന്ത്രിക്ക് ഇതുസംബന്ധിച്ച് ഒരു കത്തെഴുതാന് തീരുമാനിച്ചത്.
