തിരുവനന്തപുരം: നിലമ്പൂരില് ശമ്പളം ലഭിക്കാതെ ബിഎസ്എന്എല് കരാര് ജീവനക്കാരന് ആത്മഹത്യ ചെയ്ത സംഭവത്തില് അടിയന്തര ഇടപെടല് അഭ്യര്ഥിച്ച് കേന്ദ്ര സഹമന്ത്രി വി. മുരളീധരന് കേന്ദ്രമന്ത്രി രവിശങ്കര് പ്രസാദിനു കത്തയച്ചു. 10 മാസമായി ശമ്പളം കിട്ടാതെ നിലമ്പൂരിലെ ബിഎസ്എന്എല് കരാര് ജീവനക്കാരന് രാമകൃഷ്ണന് ആത്മഹത്യ ചെയ്തത് അബുദാബിയില് ഐഒആര്എ യോഗത്തിനിടെ ഞെട്ടലോടെയാണ് അറിഞ്ഞത്. രാമകൃഷ്ണന്റെ കുടുംബത്തിന് നീതി ലഭ്യമാക്കാന് അടിയന്തരമായി ഇടപെടണമെന്ന് കേന്ദ്ര മന്ത്രി രവിശങ്കര് പ്രസാദിനോട് അഭ്യര്ത്ഥിച്ചെന്ന് വി. മുരളീധരന് അറിയിച്ചു.
ഇന്നു രാവിലെയാണു ബി.എസ്.എന്.എല് കരാര് ജീവനക്കാരനെ നിലമ്പൂരിലെ ബി.എസ്.എന്.എല് ഓഫീസില് ആത്മഹത്യ ചെയ്തനിലയില് കണ്ടെത്തി. വണ്ടൂര് കുന്നത്തുവീട്ടില് രാമകൃഷ്ണനെയാണ് തൂങ്ങിമരിച്ച നിലയില് കണ്ടെത്തിയത്. രാവിലെ മറ്റുജീവനക്കാര് വരുന്നതിന് മുമ്പ് ഓഫീസിലെത്തിയ രാമകൃഷ്ണന് തൂങ്ങിമരിക്കുകയായിരുന്നു. ശമ്പളം മുടങ്ങിയതിനെ തുടര്ന്നാണ് രാമകൃഷ്ണന് ആത്മഹത്യ ചെയ്തതെന്നാണ് പ്രാഥമിക നിഗമനം. കഴിഞ്ഞ പത്തുമാസമായി രാമകൃഷ്ണന് അടക്കമുള്ള ബി.എസ്.എന്.എല് കരാര് ജീവനക്കാര്ക്ക് ശമ്പളം മുടങ്ങിയിരുന്നു. ഇതിനെതിരെ കരാര് ജീവനക്കാരുടെ സമരം നടക്കുന്നതിനിടെയാണ് രാമകൃഷ്ണന്റെ ആത്മഹത്യ.
