പത്തനംതിട്ട: മണ്ഡലകാലം ആരംഭിക്കാന്‍ ദിവസങ്ങള്‍ മാത്രം ശേഷിക്കെ ശബരിമല വെര്‍ച്വല്‍ ക്യൂ സംവിധാനത്തിലെ ആയിരക്കണക്കിനു സ്ലോട്ടുകള്‍ ഒഴിഞ്ഞു തന്നെ കിടക്കുന്നു. കഴിഞ്ഞ തവണ ശബരിമലയില്‍ പ്രവേശിച്ചു എന്ന രീതിയില്‍ സര്‍ക്കാര്‍ കോടതിയില്‍ സമര്‍പ്പിക്കാന്‍ വ്യാജ പട്ടിക ഉണ്ടാക്കിയത് വെര്‍ച്വല്‍ ക്യൂവിലെ വിവരങ്ങള്‍ വച്ചാണ്. ഈ ആശങ്കയുടെ ഫലമാണ് വെര്‍ച്വല്‍ ക്യൂ സംവിധാനത്തിനോട് മുഖം തിരിക്കാന്‍ ഭക്തരെ പ്രേരിപ്പിച്ചതെന്നാണ് വിലയിരുത്തല്‍.
പുരുഷന്മാരുടെ ഐഡി കാര്‍ഡിലെ വിവരങ്ങള്‍ കഴിഞ്ഞ മണ്ഡലകാലത്ത് തെറ്റായി ഉപയോഗിച്ചിരുന്നു. മാത്രമല്ല 50 വയസ്സിനു മുകളില്‍ പ്രായമുള്ളവരെ 45 വയസ്സില്‍ താഴെയുള്ളവര്‍ എന്നു കാട്ടിയാണ് കോടതിയെ തെറ്റിദ്ധരിപ്പിക്കാന്‍ വ്യാജ കണക്കുകള്‍ ഉണ്ടാക്കിയത്. ഇതിന്റെ നിജ സ്ഥിതിയും മറ്റും അറിയാന്‍ പല കോണുകളില്‍ നിന്നും ഇവര്‍ക്ക് ഭക്തര്‍ക്ക് വിളി വന്നിരുന്നു. ഈ ബുദ്ധമുട്ടുകളെല്ലാം ഒഴിവാക്കാനും യുവതീ പ്രവേശനവുമായി ബന്ധപ്പെട്ട് ആശങ്കകളുമാകാം വെര്‍ച്വല്‍ ക്യൂ പ്രയോജനപ്പെടുത്തുന്നതില്‍ നിന്ന് ഭക്തര്‍ വിട്ടു നില്‍ക്കുന്നത്.
മുന്‍ വര്‍ഷങ്ങളില്‍ സീസണ്‍ തുടങ്ങും മുന്‍പ് ആയിരക്കണക്കിനു ഭക്തരാണ് ഇത്തരത്തില്‍ ബുക്ക് ചെയ്തിരുന്നത്. എന്നാല്‍, ഇക്കുറി മണ്ഡലകാലം തുടങ്ങുന്ന 17 മുതല്‍ എല്ലാ ദിവസവും ആയിരക്കണക്കിനു സ്ലോട്ടുകള്‍ ഒഴിഞ്ഞുകിടക്കുകയാണ്. സാധാരണയായി ഇതരസംസ്ഥാനങ്ങളില്‍ നിന്നുള്ളവരാണ് ഈ സംവിധാനം പ്രയോജനപ്പെടുത്തിയിരുന്നത്.
