തൃശൂര്‍: ജില്ലയുടെ പലഭാഗത്ത് നിന്നും ഒരേ ദിവസം കാണാതായ ആറ് പെണ്‍കുട്ടികളേയും കണ്ടെത്തി. പരാതി ലഭിച്ച് മണിക്കൂറുകള്‍ക്കകമാണ് പോലീസ് പെണ്‍കുട്ടികളെ കണ്ടെത്തിയത്. ചൊവ്വാഴ്ചയാണ് ജില്ലയിലെ വിവിധ ഭാഗങ്ങളില്‍ നിന്നും പെണ്‍കുട്ടികളെ കാണാതാകുന്നത്. കുട്ടികളുടെ മാതാപിതാക്കള്‍ പരാതിയുമായി പോലീസ് സ്റ്റേഷനില്‍ എത്തുകയായിരുന്നു. സംഭവത്തില്‍ സോഷ്യല്‍ മീഡിയയാണ് പ്രധാന വില്ലനെന്നാണ് പോലീസ് പറയുന്നത്. കണ്ടെത്തിയ നാല് പെണ്‍കുട്ടികളും സമൂഹമാധ്യമങ്ങളിലൂടെ പരിചയപ്പെട്ട സുഹൃത്തുക്കള്‍ക്കൊപ്പമാണ് പോയതെന്നും പോലീസ് പറയുന്നു.
ഒരേ ദിവസം ജില്ലയിലെ വിവിധ ഇടങ്ങളില്‍ നിന്നായി പെണ്‍കുട്ടികളെ കാണാതായ സംഭവം നാട്ടുകാരില്‍ ആശങ്കയ്‌ക്കിടയാക്കിരുന്നു. സ്‌കൂള്‍, കോളേജ് വിദ്യാര്‍ത്ഥിനികളാണ് കാണാതായ ആറു പേരും, ഇതില്‍ ഒരാള്‍ക്ക് പ്രായപൂര്‍ത്തിയായിട്ടില്ല. 24 മണിക്കൂറിനിടയിലാണ് ആറ് പരാതികള്‍ പോലീസിന് ലഭിച്ചത്. തൃശൂരിലെ പുതുക്കാട്, മാള, പാവറട്ടി, ചാലക്കുടി, വടക്കാഞ്ചേരി, അയ്യന്തോള്‍ എന്നീ പോലീസ് സ്റ്റേഷന്‍ പരിധികളില്‍ നിന്നാണ് പെണ്‍കുട്ടികളെ കാണാതായത്. ഇവര്‍ ആറ് പേരും തമ്മില്‍ എന്തെങ്കിലും ബന്ധമുണ്ടോയെന്നാണ് പോലീസ് ആദ്യം പരിശോധിച്ചത്. എന്നാല്‍ ആറ് പേരും ജില്ലയിലെ വിവിധ സ്‌കൂളുകളിലും കോളേജുകളിലുമായി പഠിക്കുന്ന വിദ്യാര്‍ത്ഥികളാണെന്നും ഇവര്‍ തമ്മില്‍ പരസ്പര ബന്ധമില്ലെന്നും വ്യക്തമാവുകയായിരുന്നു.
പരാതിയില്‍ കേസെടുത്ത പോലീസ്, അന്വേഷണം ഊര്‍ജ്ജിതമാക്കി. തൃശൂര്‍ സിറ്റിയിലേയും റൂറലിലേയും ഉദ്യോഗസ്ഥര്‍ക്കായിരുന്നു അന്വേഷണ ചുമതല. കമിതാക്കള്‍ക്കൊപ്പമാണ് പെണ്‍കുട്ടികള്‍ പോയതെന്ന സൂചന പ്രാഥമിക അന്വേഷണത്തില്‍ തന്നെ പോലീസിന് ലഭിച്ചിരുന്നു. തുടര്‍ന്ന് ഇവരുടെ ആണ്‍ സുഹൃത്തുക്കളെ കേന്ദ്രീകരിച്ച് നടത്തിയ അന്വേഷണത്തിലാണ് അഞ്ച് പെണ്‍കുട്ടികളെ കണ്ടെത്തിയത്. പോലീസ് കണ്ടെത്തിയ നാല് പെണ്‍കുട്ടികളും സമൂഹമാധ്യമങ്ങളിലൂടെ പരിചയപ്പെട്ട ആണ്‍ സുഹൃത്തിനൊപ്പമാണ് പോയിരിക്കുന്നത്. ചാലക്കുടിയില്‍ നിന്നും കാണാതായ പെണ്‍കുട്ടി അയല്‍വാസിക്കൊപ്പമായിരുന്നു പോയത്. പുതുക്കാട് നിന്നും കാണാതായ പെണ്‍കുട്ടിയെ കൊല്ലത്ത് നിന്നും വടക്കാഞ്ചേരിയില്‍ നിന്നും കാണാതായ പെണ്‍കുട്ടിയെ കാസര്‍ഗോഡ് നിന്നുമാണ് കണ്ടെത്തിയത്.
തൃശൂര്‍ വെസ്റ്റ് പോലീസ് സ്റ്റേഷന്‍ പരിധിയില്‍ നിന്ന് കാണാതായ പെണ്‍കുട്ടിക്ക് പ്രായപൂര്‍ത്തിയായിട്ടില്ല. ഇത് നാലാം തവണയാണ് ഈ കുട്ടി വീട് വിട്ടുപോകുന്നത്. കുടുംബ പ്രശ്‌നമാണ് കുട്ടി നിരന്തരം ഒളിച്ചോടുന്നതിന് കാരണമെന്ന് പോലീസ് പറയുന്നു. സൈബര്‍ സെല്ലിന്റെ സഹായത്തോടെ നടത്തിയ അന്വേഷണമാണ് പെണ്‍കുട്ടികളെ കണ്ടെത്താന്‍ സഹായിച്ചത്. പെണ്‍കുട്ടികളെ കാണാതായെന്ന് ചൂണ്ടിക്കാട്ടി പോലീസ് സ്റ്റേഷനുകളില്‍ ലഭിക്കുന്ന പരാതികളുടെ എണ്ണം കൂടിവരികയാണെന്ന് അധികൃതര്‍ പറയുന്നു. പ്രായപൂര്‍ത്തിയായ പെണ്‍കുട്ടികളെ കണ്ടെത്തിയ വിവരം രക്ഷിതാക്കളെ അറിയിക്കുക എന്നത് മാത്രമാണ് പോലീസിന് നിയമപരമായി ചെയ്യാനുളളത്. രക്ഷിതാക്കള്‍ ജാഗ്രത പാലിക്കണമെന്നും പോലീസ് പറയുന്നു.
