ന്യൂദല്ഹി : ആദ്യത്തെ പരീക്ഷണം പരാജയപ്പെട്ടെങ്കിലും ചന്ദ്രന്റെ ദക്ഷിണ ധ്രുവത്തില് വിക്രം ലാന്ഡറിനെ ലാന്ഡ് ചെയ്യിക്കാന് വീണ്ടും പരിശ്രമം നടത്തി വരികയാണെന്ന് ഐഎസ്ആര്ഒ മേധാവി കെ. ശിവന്. ദല്ഹി ഐഐടിയില് സംഘടിപ്പിച്ച ചടങ്ങില് മാധ്യമ പ്രവര്ത്തകരോട് സംസാരിക്കവേയാണ് ഇക്കാര്യം വ്യക്തമാക്കിയത്.
ചന്ദ്രന്റെ ദക്ഷിണ ധ്രുവത്തില് സോഫ്ട് ലാന്ഡിങ്ങിന് ശ്രമിക്കവേയാണ് റോബോട്ടിക് വിക്രം ലാന്ഡറുമായുള്ള ബന്ധം നഷ്ടപ്പെടുകയാണ് ഉണ്ടായത്. അതിനുശേഷം ലാന്ഡറുമായി ബന്ധം സ്ഥാപിക്കാന് നിരവധി ശ്രമങ്ങള് നടത്തിയെങ്കിലും അതിന് സാധിച്ചില്ല. ഇത് വിജയിച്ചിരുന്നെങ്കില് ചന്ദ്രദൗത്യം വിജകരമായി പൂര്ത്തിയാക്കിയ നാലാമത് രാജ്യമായി ഇന്ത്യ മാറുമായിരുന്നെന്നും അദ്ദേഹം അറിയിച്ചു.
സെപ്തംബര് ഏഴിനാണ് വിക്രം ലാന്ഡര് ദക്ഷിണ ധ്രുവത്തില് സോഫ്ട് ലാന്ഡിങ്ങിന് ശ്രമിച്ചത്. എന്നാല് ചന്ദ്രനില് നിന്നും 2.1 കിലോമീറ്റര് അകലെവെച്ച് വിക്രം ലാന്ഡറുമായുള്ള ബന്ധം ഐഎസ്ആര്ഒയ്ക്ക് നഷ്ടമാവുകയായിരുന്നു. സിഗ്നല് ബന്ധം പുനസ്ഥാപിക്കാന് ശ്രമിച്ചെങ്കിലും സെപ്തംബര് 21ന് പേടകത്തിന്റെ പ്രവര്ത്തന കാലാവധിയായ ചന്ദ്രനിലെ പകല് ദിനം അവസാനിച്ചു.
സൂര്യപ്രകാശത്തിന്റെ സാന്നിധ്യത്തില് 14 ദിവസത്തെ ആയുസാണ് വിക്രം ലാന്ഡറിനുള്ളത്. എന്നാല് ഇത്രയും ദിവസത്തോളം വിക്രം ലാന്ഡറിന് ചന്ദ്രനിലെ ഇരുട്ടില് നിലനില്ക്കുമോ എന്നതും ചോദ്യം ഉയരുന്നുണ്ട്.
